نئی دہلی،16/نومبر(ایس او نیوز؍ایجنسی) دہلی ہائی کورٹ نے ای ڈی کی طرف سے ریکارڈ آئی این ایکس میڈیا منی لانڈرنگ معاملے میں سابق وزیر خزانہ پی چدمبرم کو ضمانت دینے سے جمعہ کو انکار کر دیا-عدالت نے کہا کہ ان کے خلاف لگے الزامات پہلی نظر میں سنگین نوعیت کے ہیں اور جرم میں ان کا فعال اور اہم کردار رہا ہے-جسٹس سریش کیت نے کہا کہ اگر معاملے میں چدمبرم کو ضمانت دی جاتی ہے تو اس سے معاشرے میں غلط پیغام جائے گا-ہائی کورٹ نے چدمبرم اورای ڈی دونوں کے وکیل کی دلیل سننے کے بعد ضمانت کی درخواست پر آٹھ نومبر کو فیصلہ محفوظ رکھ لیا تھا-ای ڈی نے منی لانڈرنگ میں ان کو16اکتوبر کو گرفتار کیا تھا-وہیں سی بی آئی نے آئی این ایکس میڈیا بدعنوانی معاملے میں چدمبرم کو 21اگست کو گرفتار کیا تھا اور اس معاملے میں سپریم کورٹ نے 22اکتوبر کو انہیں ضمانت دے دی تھی-سی بی آئی نے 15مئی،2017 کو مقدمہ درج کیا تھا جس میں آئی این ایکس میڈیا گروپ کو2007 میں 305کروڑ روپے کا غیر ملکی چندہ حاصل کرنے کے لئے غیر ملکی سرمایہ کاری فروغ بورڈ (ایف آئی پی بی) کی منظوری دینے میں بے ضابطگیوں کا الزام لگایا گیا تھا-اس دوران چدمبرم وزیر خزانہ تھے-اس کے بعد ای ڈی نے بھی اسی سلسلے میں 2017میں منی لانڈرنگ کا معاملہ درج کیا تھا-