نئی دہلی،21؍اگست(ایس او نیوز؍ایجنیس) سابق مرکزی وزیر پی چدمبرم کے خلاف ای ڈی (انفورسمنٹ ڈائریکٹوریٹ) نے آئی این ایکس میڈیا منی لانڈرنگ معاملہ میں بدھ کے روز لک آؤٹ نوٹس جاری کیا ہے۔ یہ نوٹس جاری ہونے کے بعد پی چدمبرم ملک سے باہر نہیں جا پائیں گے اور تمام ہوائی اڈوں، امیگریشن ڈیسکوں کو ہائی الرٹ پر رکھا گیا ہے۔

ای ڈی کی طرف سے یہ کارروائی جسٹس این وی رمنا کی قیادت والی سپریم کورٹ کی بنچ کی طرف سے چدمبرم کو گرفتاری سے راحت دینے سے انکار کے بعد انجام دی گئی۔ جسٹس رمنا نے چدمبرم کی آئی این ایکس میڈیا معاملہ میں عبوری ضمانت کی عرضی پر فوری سماعت کے لئے معالہ کو چیف جسٹس رنجن گوگوئی کے پاس بھیج دیا ہے۔

چدمبرم کے وکیل ارشدیپ سنگھ کھورانا نے زور دیتے ہوئے کہا ہے کہ لُک آؤٹ نوٹس سیاست پر مبنی ہے کیوں کہ سابق وزیر کے ملک چھوڑنے کا کوئی امکان نہیں ہے۔ کھورانا نے سی بی آئی کو لکھے خط میں کہا، ’’آپ کا نوٹس قانون کے اس التزام کا تذکرہ کرنے میں ناکام ہے جس کے تحت میرے موکل کو دو گھنٹے کے اندر حاضر ہونے کا نوٹس جاری کیا گیا ہے۔‘‘

انہوں نے کہا، ’’اس کے علاوہ میرا موکل قانون کے مطابق اپنے حقوق کا استعمال کر رہا ہے اور اس نے 20 اگست کو سپریم کورٹ کا دروازہ کھٹکھٹایا تھا، جس سے آئی این ایکس میڈیا معاملہ میں اس کی عبوری ضمامنت کی درخواست کو خراج کیے جانے کے حوالہ سے فوری راحت مل سکے۔‘‘

دریں اثنا عدالت عظمیٰ کے چیف جسٹس رنجن گوگوئی کے بابری مسجد-رام جنم بھومی تنازع کی سماعت میں مصروف ہونے کے سبب سابق مرکز وزیر پی چدمبرم کو عبوری ضمانت سے متعلق معاملہ میں فی الحال راحت نہیں مل سکی۔

پی چدمبرم کے وکیل کپل سبل نے جسٹس این وی رمن کی بنچ کے سامنے معاملہ کو پیش کیا لیکن انہوں نے اس بابت کوئی فیصلہ دینے سے انکار کرتے ہوئے متعلقہ معاملہ چیف جسٹس کے پاس بھیج دیا۔ جسٹس رمن نے اس درمیان چدمبرم کو گرفتاری سے عبوری راحت دینے سے بھی انکار کردیا۔

اس کے بعد کپل سبل نے چیف جسٹس کی بنچ کی جانب رخ کیا لیکن وہاں بابری مسجد-رام جنم بھومی تنازع کی سماعت شروع ہوچکی تھی، اس لئے سابق مرکزی وزیر کی عرضی پر سماعت نہیں ہوسکی۔

خیال رہے دہلی ہائی کورٹ نے آئی این ایکس میڈیا معاملہ میں چدمبرم کی پیشگی ضمانت کی عرضی منگل کو مسترد کر دی تھی۔ درخواست مسترد ہونے کے بعد ای ڈی اور مرکزی تفتیشی بیورو (سی بی آئی) کی ٹیمیں چدمبرم کی نئی دہلی کے جورباغ علاقہ میں واقع رہائش گاہ پر گئی تھیں مگر وہ گھر میں موجود نہیں تھے۔

ای ڈی کے حکام نے کہا ہے کہ منگل کو دہلی ہائی کورٹ نے چدمبرم کی پیشگی ضمانت کی درخواست مسترد کر دی تھی۔ لک آؤٹ نوٹس کے سلسلہ میں حکام نے کہا کہ یہ قدم احتیاط کے طور پر اٹھایا گیا ہے کیونکہ فی الحال چدمبرم کہاں ہیں اس کی جانکاری نہیں ہے۔ تفتیشی ایجنسی نے کہا کہ آئی این ایکس میڈیا معاملہ کی جانچ کو آگے بڑھانے کے لئے چدمبرم کی اس کے سامنے موجودگی ضروری ہے۔