موبائل ٹاورس کی تنصیب کے لئے حکومت سے اجازت لازمی: یوٹی قادر
بنگلورو،30/مئی(ایس او نیوز)ریاستی وزیر برائے شہری ترقیات یو ٹی قادرنے کہا ہے کہ ریاست کے کسی بھی حصے میں موبائل ٹاور سمیت کوئی بھی ٹاور نصب کرنے کے لئے ریاستی حکومت سے اجازت لینا لازمی ہے۔ اخباری نمائندوں سے بات چیت کرتے ہوئے انہوں نے کہاکہ شہری علاقوں میں ٹاور کی تنصیب کے لئے اجازت کا مخصوص طریقہئ کار رائج ہے، اس طریقے کے مطابق لازمی طور پر اجازت نہیں لی گئی تو ٹاور کو ہٹانے کا بھی محکمے کو اختیار حاصل ہے۔ انہوں نے کہاکہ جس عمارت پر ٹاور کھڑا کیا جائے گا نہ صرف اس کی تعمیر کی اجازت لازمی ہوگی بلکہ عمارت کی تکمیل کے بعد ٹاور کی تنصیب کے لئے بھی الگ سے اجازت لینی ہوگی۔ اس کے لئے ریاستی حکومت کی طرف سے فیس متعین کی جائے گی، اس کی ادا ئیگی کے بعدہی اجازت نامہ جاری کیا جائے گا۔ وزیر موصوف نے بتایا کہ اسکولوں اور کالجوں سے موبائل ٹاور کی دوری کے لئے پہلے ہی ریاستی حکومت کی طرف سے ضوابط مقرر کئے گئے ہیں۔ کسی بھی ٹاور کی تنصیب کے لئے اجازت ان ضوابط کی بنیاد پر ہی دی جائے گی، کیونکہ تعلیمی اداروں کے پاس اگر موبائل ٹاور موجود ہوں تو اس سے ہونے والے ریڈیئشن سے بچوں کی صحت پر اثر پڑے گا اور ریاستی حکومت اس کا مو قع ہرگز دینا نہیں چاہتی۔