بھٹکل انجمن انسٹی ٹیوٹ آف ٹکنالوجی اینڈ مینجمنٹ کے زیر اہتمام انوویشن اینڈ انٹر پرپرئیورنر شپ سنٹر کا افتتاح
بھٹکل:16؍جنوری (ایس اؤ نیوز)انجمن انسٹی ٹیوٹ آف ٹکنالوجی اینڈ مینجمنٹ بھٹکل کے زیرا ہتمام انوویشن اینڈ اینٹرپرئیونرشپ سنٹر کا 16جنوری بروز سنیچر کی صبح انجمن حامئی مسلمین بھٹکل کے کالج بورڈ سکریٹری محی الدین رکن الدین کے ہاتھوں افتتاح عمل میں آیا۔
افتتاحی اجلاس میں منی پال ، ماہے کے چیف انوویشن آفیسر ڈاکٹر ارون شانبھاگ نے زوم آن لائن وڈیو گرافی کےذریعے مہمان خصوصی کی حیثیت سے پروگرام میں شریک رہے ، اپنے لائیو وڈیو خطاب میں انہوں نے کہا کہ حکومتوں سے یہ ممکن نہیں کہ وہ ہر ایک کےلئے روزگار فراہم کرے۔ بلکہ اس سلسلےمیں ہم لوگوں کو ہی اپنی ذمہ داریاں ادا کرنی ہوگی۔ یعنی ہمیں خود جدید طریقوں کی تلاش کرنی ہوگی اور لوگوں کو روزگار فراہم کرنا ہوگا۔ اسی کو انٹر پرنیورشپ کہاجائےگا۔ انہوں نے کہا کہ جدید ٹکنالوجی کے چلتے کئی روزگار غائب ہوگئے ہیں ان حالات میں ہمیں مایوس ہونا یا افسوس ظاہر کرنا اچھی بات نہیں ہے اور نہ ہی اپنے پرانے اسٹاف کو تربیت دےکر آگے بڑھانے کی بات کرنا مناسب ہے۔ بلکہ ہمیں اپنے معاشرے اور حالات کا جائزہ لینا ہوگا ، اس کا بہتر طور پر مطالعہ کرتے ہوئے جدت کو اپناکر مقامی مسائل کی طرف توجہ دینا ہوگا۔ جدت کا مطلب نئی تخلیق نہیں ہے بلکہ ٹکنالوجی کا تخلیقی انداز میں استعمال ہے۔ ہم دیکھیں کہ کس طریقہ کار سے مسائل کا حل نکل سکتاہے۔
پروگرام میں 1985بیچ کے الومنی کرن وٹھل اور وشوناتھ ہونیا نے سنٹر کے اغراض ومقاصد بیان کئے۔ دھارواڑ کے سی ای ڈی او ٔ کے کے ڈپٹی ڈائرکٹر شیوانند یلیگار ، ڈائرکٹر ڈاکٹر ویرنا ایس حوالدار نے اعزازی مہمان کے طورپر اپنے خیالات کااظہارکیا۔ ایم آئی ٹی آئی ڈی پونا کے شعبہ میکرس اسپیس کے ہیڈ پروفیسر سوریا نارائن راؤ نے خیرسگالی کا پیغام پیش کیا۔ 1985بیچ کے الومنی سائی ناتھ تگڑی نے اپنے خیالات پیش کئے۔کالج پرنسپال ڈاکٹر مشتاق بھاوی کٹی نے سنٹر کی اہمیت پر روشنی ڈالی۔ جب کہ انجمن حامئی مسلمین کے صدر قاضیا مزمل نے صدارت کی۔ پروگرام میں لوگو مقابلے میں جیت حاصل کرنے والے سید شئیہان کو انعام سے نوازاگیا۔
پروگرام کا آغاز پروفیسر عبدالمقیت کی تلاوت قرآن سے ہوا۔ پروفیسر شری شئیل بھٹ اور امِّ فروا نے نظامت کے فرائض انجام دئیے۔ سنٹر کے ڈائرکٹر ڈاکٹر اننت مورتی شاستری نے کلمہ تشکر ادا کیا۔