تین ماہ جیل میں گذارنے کے بعد مسلم چوڑی فروش جس کی ہجوم کے ہاتھوں پیٹائی ہوئی تھی‘ ضمانت پر رہا
اندور، 8؍دسمبر (ایس او نیوز؍ایجنسی) تین ماہ سے زائد عرصہ تک جیل میں گذارنے کے بعد تسلیم نامی چوڑی فروش منگل کے روز ضمانت پر رہا ہوگیا ہے۔ تسلیم کو مدھیہ پردیش ہائی کورٹ کی اندور بنچ نے ضمانت دی ہے۔ تسلیم کوایک شدت پسند گروپ نے اندور میں مبینہ طور پر اس کی مسلم شناخت پر بے رحمی کے ساتھ پیٹا تھا اور بعد میں پولیس نے مظلوم کو ہی گرفتار کرلیاتھا۔
تسلیم کی ضمانت پر رہائی کے بعد ان کے وکیل احتشام نے اس کو ”آئین کی جیت“ قراردیاہے۔ اندور کے علاقے بانگنگا میں پرہجوم گلی میں 22 اگست کے روز ایک ہجوم نے بے رحمی کے ساتھ تسلیم کی پیٹائی کردی تھی۔ سوشیل میڈیا پر اس واردات کی ویڈیو وائیرل ہوئی تھی تاہم مارپیٹ کا واقعہ گذرنے کے 24گھنٹوں کے اندر تسلیم پر ایک 13سالہ لڑکی کے ساتھ نازیبا سلوک کرنے کے علاوہ دیگر جرائم پر مشتمل ایک مقدمہ درج کرلیاگیاتھا اور تسلیم کو ہی گرفتار کیا گیا تھا۔
راکیش پوارنامی ایک شخص نے شکایت درج کرائی تھی جس کے بعد تسلیم پر آئی پی سی کی دفعہ 354‘354اے‘ 467‘467‘’471‘’420اور 506اور پی او سی ایس او ایکٹ کی دفعہ7اور 8کے تحت مقدمہ درج کیاگیاتھا۔ پوار ان چارملزمین میں سے ایک ہے، جنھیں تسلیم کی شکایت پر گرفتار کیاگیاتھا‘ اور اب وہ ضمانت پر باہر ہے۔ اُس پر مذہبی جذبات کوٹھیس پہنچانے‘ ڈکیتی‘ اور مذہب کی بنیاد پر دشمنی بھڑکانا‘ کے علاوہ دیگر الزامات کے تحت مقدمات درج کئے گئے تھے۔
احتشام ہاشمی کے حوالے سے انڈین ایکسپریس میں شائع رپورٹ کے مطابق ’جسٹس سوجوئے پال نے اپنی چارج شیٹ میں مشاہدہ کیاہے کہ تسلیم کو غنڈوں نے مارا پیٹااو ر پھر ان کی شکایت کے بعدکراس ایف ائی آردرج کرائی گئی “۔