نئی دہلی، 19 ستمبر (یو این آئی) ہندوستانی کرکٹ ٹیم نئے سال میں ممکنہ طور پر پانچ سے چھ جنوری کو کیپ ٹاؤن میں اپنا جنوبی افریقی دورہ شروع کرے گی۔ اس سلسلے میں ہندوستانی کرکٹ کنٹرول بورڈ (بی سی سی آئی) اور کرکٹ ساؤتھ افریقہ (سی ایس اے ) آئندہ تین یا چار دنوں میں اس دورے کی پروگرام کو حتمی شکل دے سکتی ہے ۔ انٹرنیشنل کرکٹ کونسل (آئی سی سی ) کے فیوچر ٹور پروگرام ( ایف ٹی) کے تحت دونوں ٹیموں کے درمیان چار ٹسٹ ، تین ون ڈے اور تین ٹی۔20 میچوں کی سیریز کھیلی جانی ہے ۔ سال کے ابتدا سے ہی دونوں ملکوں کے بورڈ پروگرام کو حتمی شکل دینے کی کوشش کررہے ہیں۔ لیکن اب تک آخری فیصلہ نہیں لیا جاسکا ہے ۔ اگست میں بی سی سی آئی نے جنوبی افریقہ پر واضح کیاتھا کہ ہندوستانی ٹیم کے لئے 2017 کے آخری ہفتے سے قبل دورہ ممکن نہیں ہوگا۔ کیونکہ ہندوستان اور سری لنکا کے درمیان گھریلو سیریز 24 دسمبر کو مکمل ہورہی ہے ۔وہیں بورڈ کھلاڑیوں کے برن آؤٹ کو دیکھتے ہوئے جنوبی افریقی دورے سے قبل کھلاڑیوں کو کچھ آرام دینا چاہتا ہے ۔ دوسری جانب نئے سال کی چھٹیوں کو دیکھتے ہوئے جنوبی افریقہ بورڈ چاہتا ہے کہ ہندوستان جنوبی افریقہ کے درمیان پہلا ٹسٹ چار جنوری سے شروع ہو تاکہ اسے دیکھنے کے لئے زیادہ سے زیادہ شائقین اسٹیڈیم پہنچیں۔لیکن بورڈکی دلیل ہے کہ ہندوستان کو بڑی سیریز سے قبل تیاری کی ضرورت ہے اور وہ اہم سیریز سے پہلے پریکٹس میچ بھی کھیلنا چاہتا ہے ایسے میں امید ہے کہ سیریز سے پہلے دسمبر کے آخر میں پریکٹس میچ کھیلا جاسکتا ہے ۔وہیں اس طرح کا بھی اندازہ ہے کہ ہندوستانی کرکٹ بورڈ اس بات سے ناراض ہے کہ ساؤتھ افریقہ کرکٹ میں آسٹریلیا کے ساتھ یکم مارچ سے اپنی سیریز کے تیاریوں کا پروگرام طے کرلیا ہے لیکن ہندوستان کے ساتھ سیریز کی تاریخیں طے نہیں کی۔جنوبی افریقی دورے کے فورا بعد ہندوستان کو سری لنکا روانہ ہونا ہے ۔ جہاں وہ ٹی۔20سہ رخی سیریز کھیلے گی اوراس کے بعد وطن واپس آجائے گی جہاں وہ دنیا کے مقبول ترین انڈین پریمیر لیگ میں کھلاڑیوں کو اترنے کا موقع دے گی۔ہندوستان نے آخری مرتبہ 2013میں جنوبی افریقہ کا دورہ کیا تھا اس دوران دونوں بورڈس کے درمیان کشیدگی کے سبب پروگرام کو مختصر کردیا گیا تھا۔ جس سے جنوبی افریقہ کو مالی نقصان کا سامنا کرنا پڑا تھا۔ایسے میں اب اس کا دھیان ہندوستان اور آسٹریلیا سیریز سے اچھی آمدنی پر ہے ۔