نئی دہلی، 31/اکتوبر (ایس او نیوز /ایجنسی) ہندوستانی ریلوے نے اس سال دیوالی اور چھٹ کے تہوار کے دوران ملک کے مشرقی حصے کی طرف جانے والے عام طبقے کے مسافروں کو باعزت اور محفوظ سفر کی سہولیات فراہم کرنے کے لیے متعدد نئے اقدامات متعارف کرائے ہیں۔ ان اقدامات کا مقصد مسافروں کی حفاظت کو یقینی بنانا اور انہیں آرام دہ طریقے سے اپنی منزل تک پہنچنے میں مدد دینا ہے، تاکہ وہ تہوار کی خوشیوں کو بھرپور انداز میں منا سکیں۔

ریلوے کے سرکاری ذرائع کے مطابق اس سال جنرل کلاس کے مسافروں کیلئے ۷۲۹۶؍ خصوصی ٹرینیں چلانے کا منصوبہ بنایا گیا ہے۔ یہ ٹرینیں طلب کے لحاظ سے یکم اکتوبر سے۳۰؍ نومبر کے درمیان چلائی جائیں گی۔ قابل ذکر ہے کہ۲۰۲۳ء میں خصوصی ٹرینوں کی تعداد ۴۵۰۰؍ کے قریب تھی جبکہ ۲۰۱۴ء سے پہلے یہ تعداد تقریباً  ایک ہزار تھی۔ 

ذرائع کے مطابق امسال تہوار کے موسم میں تقریباً ایک کروڑ لوگ روزانہ مشرقی اتر پردیش، بہار اور جھارکھنڈ کی طرف سفر کر رہے ہیں جن میں سے۲۲؍سے۲۳؍ لاکھ ریزرو کیٹیگریز میں سفر کر رہے ہیں جبکہ باقی غیر محفوظ عام زمرے کے غریب مسافر ہیں۔ ذرائع نے بتایا کہ ریلوے نے دارالحکومت کے علاقے نئی دہلی، آنند ویہار وغیرہ اسٹیشنوں پر کم از کم ایک ہولڈنگ ایریا بنایا ہے۔ اس میں عام کلاس کے مسافروں کو روکا جاتا ہے۔ ان کے کھانے اور پانی کا بھی انتظام کیا جا رہا ہے۔ ٹرین کے پلیٹ فارم پر پہنچنے اور پھاٹک کھلنے کے بعد ہی انہیں اسٹیشن کے اندر لایا جاتا ہے اور ٹرین کی مسافروں کی گنجائش کے مطابق جتنے مسافر ٹرین میں سوار ہو سکتے ہیں پلیٹ فارم پر لایا جاتا ہے۔ اس کے بعد ٹرین کے پھاٹک بند کرنے کے بعد ٹرین کو روانہ کیا جاتا ہے اور باقی مسافروں کو دوسری ٹرین میں سوار کرایا جاتا ہے۔ 

یہی نہیں، ریلوے حکام اس بات کو بھی یقینی بنا رہے ہیں کہ اگر مسافر بیت الخلا میں پائے گئے تو ٹرین کو چلنے نہیں دیا جائے گا۔ مسافروں کے ٹوائلٹ خالی کرنے کے بعد ہی ٹرین شروع کرنے کا اشارہ دیا جائے گا۔ ذرائع نے بتایا کہ دیوالی کے موقع پر جمعرات۳۱؍اکتوبر یعنی آج ریلوے مشرقی ہندوستان کے مختلف مقامات کیلئے ۱۶۴؍ خصوصی ٹرینیں چلائے گا اور اگلے دن جمعہ یکم نومبر کو۱۶۷؍خصوصی ٹرینیں چلائی جائیں گی۔