بھٹکل میں انڈین نوائط فورم کی طرف سے ڈیالیسس سینٹر؛ اپریل کے پہلے ہفتہ میں افتتاح ہونے کی توقع؛ مریض پہلی فرصت میں نام رجسٹر کرائیں
بھٹکل 7 مارچ (ایس او نیوز)انڈین نوائط فورم (آئی این ایف) نے بھٹکل کے گردہ کے مرض میں مبتلا مریضوں کے لئے بڑی راحت پہنچاتے ہوئے ڈیالیسس سینٹر قائم کرنے کا اعلان کیا ہے، جس کا افتتاح اپریل کے پہلے ہفتہ میں ہونے کی توقع ہے۔
انڈین نوائط فورم کے جنرل سکریٹری معاذ جوکاکو نے آج اتوار کو ایک پریس کانفرنس سے خطاب کرتے ہوئے بتایا کہ بھٹکل میں ڈیالیسس کے کافی مریض پائے جاتے ہیں جو بھٹکل میں سہولت نہ ہونے کی بناء پر کنداپور ، اُڈپی اور منی پال وغیرہ اسپتالوں میں جانے پر مجبور ہیں، گردہ کے مرض میں مبتلا ان مریضوں کی پریشانیوں کو دیکھتے ہوئے آئی این ایف بھٹکل اور اطراف کے مریضوں کے لئے بھٹکل ویلفئیر اسپتال کامپلیکس میں ہی ایک ڈیالیسس سینٹر قائم کررہا ہے جس کو چلانے کے لئے بھٹکل ویلفئیر اسپتال سمیت کیرالہ کے ایک سماجی ادارہ تھنل کا بھی تعاون حاصل ہے۔ معاذ نے بتایا کہ چار ڈیالسس مشینوں سے شروعات کی جائے گی، پھر اس میں بتدریج اضافہ کرتے ہوئے نو مشینیں لگانے کا منصوبہ بنایا گیا ہے۔ انہوں نے کہا کہ اگر مریضوں کی تعداد مزید زیادہ پائی جاتی ہے تو آئندہ چل کر اس میں بھی اضافہ ممکن ہے۔ انہوں نے ڈیالسس کے مریضوں سے درخواست کی کہ اگر وہ یہاں ڈیالسس کرانا چاہتے ہیں تو پہلی فرصت میں اپنا نام ویلفئیر اسپتال میں رجسٹرڈ کرائیں۔ انہوں نے بتایا کہ آئی این ایف کی طرف سے جو ڈیالسس سینٹر قائم کیا جارہا ہے وہ صرف عوامی خدمت کے لئے قائم کیا جارہا ہے اوراس سے منافع حاصل کرنا مقصود نہیں ہے۔ انہوں نے واضح کیا کہ معقول فیس ہوگی جوصرف سینٹر چلانے کے اخراجات کے طور پر لی جائے گی۔
ڈیالسس سینٹر میں اپنا سلوڈ بُک کرنا ہے تو مریضوں کے لئے ضروری ہے کہ وہ ویلفئیر اسپتال کے ریسپشن نمبر 9019330977 پر فون کرکے اپنا نام ڈیالسسس کے لئے درج کرائیں۔
خیال رہے کہ ہندوستان کے آٹھ شہروں میں قائم بھٹکل کی مختلف جماعتوں کا مشترکہ پلیٹ فارم انڈین نوائط فورم کا قیام 2018 میں ہوا تھا جس کے تحت 2019 میں کامیاب روزگار میلہ منعقد ہوا تھا جس کے ذریعے سینکڑوں لوگوں نے ملازمت حاصل کی تھی۔ فورم نے کورونا لاک ڈاون کے دوران بھی قوم و ملت کے لئے کافی خدمات انجام دی تھی جبکہ فورم ہیلتھ کیئیر اور میڈیکل کئیر سمیت تعلیم کے میدان میں نوجوانوں کو آگے بڑھنے میں تعاون فراہم کرتا ہے، فورم بالخصوص غریب او رنادار لوگوں کی ہرممکن مدد بھی کرتا ہے۔
آج کی پریس کانفرنس میں جنرل سکریٹری معاذ جوکاکو کے ساتھ ساتھ سکریٹری سیفان شینگیری، انتظامیہ اراکین امتیاز دامدا، ہاشم محتشم، حارث شابندری، غفران لنکا اور طلحہ اکرمی موجود تھے۔