انڈین نوائط فورم کی جانب سے لوگو ڈیزائن کرنے کا مقابلہ؛ بہترین ڈیزائن کرنے پر دس ہزار روپئے کے انعامات کا اعلان
بھٹکل 25/جنوری (ایس او نیوز) بیرون بھٹکل میں قائم بھٹکل کی آٹھ جماعتوں پر مشتمل انڈین نوائط فورم (آئی این ایف) نے اپنے ادارہ کے لئے خوبصورت لوگو (LOGO) ڈیزائن کرنے کا مقابلہ منعقد کیا ہے اور سب سے خوبصورت اور بہترین لوگو ڈیزائن کرنے پر دس ہزار روپئے کے انعامات کا اعلان کیا ہے۔
لوگو ڈیزائن کرنے کے اس مقابلے میں کوئی بھی ممبر حصہ لے سکتا ہے، مرد اور خواتین کے ساتھ ساتھ مقابلے میں شریک ہونے کے لئے عمر کی بھی کوئی قید نہیں ہے۔البتہ لوگو ڈیزائن کرتے وقت اس بات کو ذہن نشین کرنا ہوگا کہ وہ پہلے نوائط فورم کے تعلق سے جان لیں کہ یہ کیا ادارہ ہے اور اس کی کیا سرگرمیاں ہیں۔ لوگو ڈیزائن کرنے کے لئے اس بات کو بھی ذہن نشین کرنے کے لئے کہا گیا ہے کہ لوگو پر مختصر پیغام ہو، آٹھ بھٹکلی جماعتوں پر مشتمل ہونے کا اشارہ ہو، ادارہ کاحدف اور مقصد بھی واضح ہوجائے اور یکجہتی، اتحاد، انسانیت، سالمیت وغیرہ کی بھی نشاندہی ہوسکے۔ ایک شخص زیادہ سے زیادہ دو لوگو ڈیزائن کرکے روانہ کرسکتا ہے۔
اپنے ڈیزائن کردہ لوگو وہاٹس ایپ نمبر 9886180601 پر روانہ کرسکتے ہیں۔ لوگو روانہ کرنے کی آخری تاریخ 7/فروری 2020 بروز جمعہ ہے۔ مزید تفصیلات کے لئے بھی 9886180601 پر رابطہ کیا جاسکتا ہے۔
پریس ریلیز جاری کرتے ہوئے بتایا گیا ہے کہ مقابلہ میں شریک تمام لوگوں کو سرٹی فیکٹ سے نوازا جائے گا۔