نئی دہلی، 3/ستمبر (ایس او نیوز /ایجنسی) کیرالہ، کرناٹک، مہاراشٹرا اور گجرات کے  بعد اب آندھرا پردیش میں زوردار  بارش کے بعد ریاست کے کئی  علاقوں میں سیلاب جیسی صورتحال پیدا ہو گئی ہے،جس کو دیکھتے ہوئے  ہندوستانی بحریہ راحت اور بچاؤ کے کاموں میں مصروف ہے۔  میڈیا رپورٹوں کے مطابق  ریاست میں  ایڈوانسڈ لائٹ ہیلی کاپٹرز (اے ایل ایچ) تعینات کیے گئے ہیں۔ دریں اثنا، بحریہ کی مدد سے مختلف علاقوں میں پھنسے ہوئے 22 افراد کو بچا لیا گیا ہے۔

رپورٹوں میں بتایا گیا ہے کہ آندھرا پردیش میں مسلسل بارشوں کے بعد سیلاب جیسی صورتحال کی وجہ سے مقامی انتظامیہ سے موصول ہونے والی درخواستوں کی بنیاد پر ہندوستانی بحریہ کے طیارے، فلڈ ریلیف ٹیم (ایف آر ٹی) اور مشرقی بحریہ کمان کی غوطہ خوری ٹیموں کو وشاکھاپٹنم میں تعینات کیا گیا ہے۔ یہ ٹیمیں انسانی امداد اور قدرتی آفات سے نمٹنے میں مصروف ہیں۔ بحریہ کے ذرائع  کے حوالے سے ہوئے بتایا گیا ہے کہ متاثرہ علاقوں میں سرچ اینڈ ریسکیو آپریشن کے لیے مجموعی طور پر چار ہیلی کاپٹر اور ایک ڈورنیئر طیارہ تعینات کیا گیا ہے۔ بحریہ نے یہاں دو ایڈوانسڈ لائٹ ہیلی کاپٹر اور دو چیتک ہیلی کاپٹر تعینات کیے ہیں۔ اور پھنسے ہوئے افراد کو خطرناک صورتحال سے نکالنے کی کاروائی جاری ہے۔ اس کے ساتھ ہی سیلاب میں پھنسے لوگوں کے لیے فضا سے ہی  1000 کلو سے زیادہ خوراک نیچے گرایا گیا ہے۔

 بحریہ کے حوالے سے بتایا گیا کہ  آندھرا پردیش میں 10 ایف آر ٹی کو بھی تعینات کیا گیا ہے تاکہ بچاؤ کی کوششوں کو بڑھایا جا سکے۔ امدادی ٹیموں کے ساتھ اضافی بحری ٹاسک فورسز اور متعلقہ آلات کو ضروری مدد فراہم کرنے کے لیے اسٹینڈ بائی پر رکھا گیا ہے۔

یاد رہے کہ حال ہی میں کیرالہ کے وائناڈ میں شدید بارش کی وجہ سے لینڈ سلائیڈنگ ہوئی تھی۔ اس کے بعد وہاں بھی لوگوں کو محفوظ مقامات پر لے جانے کے لیے ایڈوانسڈ لائٹ ہیلی کاپٹر (اے ایل ایچ) کا استعمال کیا گیا تھا۔ وائناڈ میں راحت اور بچاؤ کی کوششوں کو مضبوط بنانے کے لیے، کوسٹ گارڈ ایئر انکلیو، کالی کٹ سے ایڈوانسڈ لائٹ ہیلی کاپٹر (اے ایل ایچ) کو بچاؤ کارروائیوں میں بہتر فضائی مدد فراہم کرنے کے لیے بھی تعینات کیا گیا تھا۔ اب آندھرا پردیش کے مختلف علاقوں میں ہوائی راستے سے امدادی سامان گرانے کے لیے بھی ہیلی کاپٹروں کی مدد لی جا رہی ہے۔