خلیج سے ہندوستانیوں کے تخلیہ کیلئے بحریہ اور فضائیہ کے جہاز تیار
نئی دہلی،30؍اپریل (ایس اونیوز؍آئی این ایس انڈیا) حکومت نے ہندوستانی بحریہ (انڈین نیوی) کو ہدایت دی ہے کہ وہ کورونا لاک ڈاؤن کی وجہ سے خلیجی ممالک میں پھنسے ہندوستانیوں کو وطن واپس لانے کے لئے اپنے بڑے جہاز تیار رکھے۔ ہندوستان نے کووڈ۔ 19وباء کی وجہ سے اندرون و بیرون ملک 3؍ مئی تک سفری امتناعی عائد کررکھا ہے۔ گزشتہ ہفتہ تینوں سروس چیفس اور چیف آف ڈیفنس اسٹاف کی وزیر اعظم اور کابینی وزراء کے ساتھ میٹنگ میں یہ ہدایت دی گئی ۔ بحریہ اور فضائیہ سے کہا گیا کہ وہ ہندوستانی شہریوں کو خلیجی ممالک سے واپس لینے اپنے جہاز تیار رکھیں۔
وزیر خارجہ ایس جئے شنکر نے کہا کہ خلیجی ممالک میں ہندوستانی سفارت خانے ؍ قونصل خانے مقامی حکام کے ساتھ مل کر کام کررہے ہیں تا کہ ہندوستانی شہریوں کو ایک مقام پر اکٹھا کیا جائے۔ وطن واپسی کے خواہاں افراد کا رجسٹریشن شروع ہوچکا ہے۔ ہندوستانیوں کے تخلیہ کے لئے آئی این ایس جلا شو جیسے بڑے بحری جہاز کے علاوہ دیگر 2 ؍ جہاز تیار رکھے جارہے ہیں۔ ان جہازوں کو سیناٹئز کیا جائے گا اور سماجی دوری بھی برقرار رکھی جائے گی۔ تینوں جہاز سماجی دوری برقرار رکھتے ہوئے لگ بھگ 2 ہزار افرد لاسکتے ہیں۔ ہندوستانی فضائیہ جنوری سے کورونا زدہ ممالک سے ہندوستانیوں کا تخلیہ کرارہی ہے۔ وہ چین، جاپان، ایران، کویت اور اٹلی سے ہندوستانیوں کو واپس لا چکی ہے۔ اس نے C-17گلوب ماسٹر اور C-130طیاروں کو تیار رکھا ہے۔ ان کے علاوہ ایر انڈیا کے طیارے بھی تیار رکھے جارہے ہیں۔