دبئی: بینک اکاؤنٹ میں غلطی سے 1.2 کروڑ روپے جمع کئے جانے کے بعد واپس نہ لوٹانے پر ہندوستانی شخص کو ہوئی جیل
دبئی، 29؍دسمبر (ایس او نیوز؍ایجنسی) دبئی کی ایک عدالت نے ایک ہندوستانی شخص کو اس کے اکاؤنٹ میں غلطی سے جمع ہوئے 1.2 کروڑ روپے واپس نہ لوٹانے پر ایک مہینہ کی جیل کی سزا سنائی ہے۔ انگریزی روزنامہ ’دی نیشنل‘ کی رپورٹ کے مطابق دبئی کریمنل کورٹ نے اس شخص کو اتنی ہی رقم کا جرمانہ ادا کرنے اور سزا پوری ہونے کے بعد اسے ملک بدر کرنے کا حکم دیا ہے۔ قصوروار نے عدالت کو بتایا کہ اسے پیسے ٹرانسفر ہونے کی اطلاع ملی، لیکن یہ جانکاری نہیں تھی کہ پیسہ کہاں سے آیا۔ اس نے عدالت کو یہ بھی بتایا کہ بینک میں آئی ہوئی رقم سے اُس نے اپنا کرایہ اور دوسرے اخراجات کی ادائیگی کی ہے۔
’دی نیشنل‘ نے اس شخص کے حوالے سے بتایا کہ ایک کمپنی نے مجھ سے پیسہ واپس کرنے کے لیے کہا لیکن میں نے انکار کر دیا کیونکہ مجھے پتہ نہیں تھا کہ پیسہ اس کا ہے یا نہیں۔ پیسہ ایک میڈیکل ٹریڈنگ کمپنی کے ذریعہ ٹرانسفر کیا گیا تھا۔
میڈیکل ٹریڈنگ کمپنی کے ایک افسر نے عدالت کو بتایا کہ غلطی سے پیسہ کمپنی کے اکاؤنٹ کے یکساں دوسرے اکاؤنٹ میں جمع ہو گیا۔ ملزم کے ذریعہ پیسہ واپس کرنے سے انکار کرنے پر کمپنی نے واقعہ کی اطلاع الرفع پولیس اسٹیشن کو دی۔ دبئی پبلک پرازیکیوشن نے ان پر غیر قانونی طریقے سے دولت حاصل کرنے کا الزام عائد کیا۔ قصوروار ٹھہرائے گئے شخص نے فیصلے کے خلاف اپیل کی ہے اور آئندہ ماہ سماعت کی امید ہے۔