خاتون سہ رخی ٹی 20سیریز: انگلینڈ کے خلاف ہندوستانی ٹیم کو جیت کی توقع
ممبئی ،24؍ مارچ ( ایس او نیوز؍آئی این ایس انڈیا )پہلے میچ میں آسٹریلیا سے شکست جھیلنے والی ہندوستانی ٹیم انگلینڈ کے خلاف خواتین ٹی 20سہ رخی سیریز کے میچ میں کل اترے گی تو اس کا ارادہ جیت کا سلسلہ شروع کرنے کا ہوگا۔پہلے میچ میں چھ وکٹ سے ہارنے والی میزبان ٹیم کو تینوں شعبوں میں اپنی کارکردگی کو بہتر بنانا ہوگا۔ ہندوستان کے مڈل آرڈر اور نچلے آرڈر کے بلے باز رن نہیں بنا سکے ہیں جو ٹیم مینجمنٹ کے لئے تشویش کا باعث ہے۔ویدا کرشنامورتی، ہرمنپریت کور اور متالی راج کو بھی بہتر کارکردگی کا مظاہرہ کرناہوگا۔متالی اور ہرمنپریت کورفارم میں ہو تو انگلینڈ کے بولنگ حملے کی بخیا ادھیڑ سکتی ہیں۔ممبئی کی جیمما رودرگیج کو بھی اپنی صلاحیت کا نمونہ پیش کرنے کی ضرورت ہے۔ نائب کپتان اسمرتی مندھانا نے 67 رنز کی بہترین اننگز کھیلی لیکن اپنا وکٹ غیر ذمہ دارانہ شاٹ کھیل کر گنوا دیا۔انہیں آخر تک رہنے کی ضرورت ہے۔بولنگ میں تجربہ کار فاسٹ بولر جھولن گوسوامی نے آسٹریلیائی ٹاپ آرڈرکو ہلاکر رکھ دیا ہے لیکن انہیں شکھا پانڈے اور رومیلی دھر سمیت باقی گیند بازوں سے تعاون نہیں مل سکا۔اسپنر پونم یادو اور دیپتی شرما سے بھی بہتر کارکردگی کی توقع کی جائے گی۔انگلینڈ کے بلے بازوں نے کل آسٹریلیائی اسپنروں کو بخوبی کھیلا لہٰذا ہندوستانی اسپنروں کو کچھ مختلف کرنا ہوگا۔انگلینڈ نے آسٹریلیا کو آٹھ وکٹ سے شکست دی اور وہ اس تال کو برقرار رکھنا چاہے گا۔