ڈربن   ، 30؍جنوری (ایس او نیوز؍ایجنسی ) ہندوستان نے پہلا انڈر 19 ویمنز ٹی۔ٹوئنٹی ورلڈ کپ جیت لیا.  فائنل میں انگلینڈ کو سات وکٹوں سے شکست دی۔ شیفالی ورما کی ٹیم کو جیت کے لیے 69 رنز کا ہدف ملا تھا۔ اس کے ساتھ ہی ٹیم انڈیا نے ہدف 3 وکٹوں  کے نقصان پر حاصل کر لیا۔

خواتین کے انڈر 19 ٹی ۔ٹوینٹی ورلڈ کپ میں کئی ہندوستانی کھلاڑیوں نے شاندار کھیل پیش کیا۔ بلے بازوں نے جہاں شاندار بلے بازی کا تماشا پیش کیا وہیں باؤلرز نے مخالف گیند بازوں پر تہلکہ مچا دیا۔اس کے ساتھ ہی ہندوستانی ٹیم کی کپتان شیفالی ورما نے 172 رنز بنائے۔ شیفالی ورما اس ٹورنامنٹ میں سب سے زیادہ رنز بنانے والی تیسری کھلاڑی تھیں۔ ہندوستانی کپتان نے 7 میچوں میں 24.57 کی اوسط سے 172 رنز بنائے۔

انگلینڈ نے پہلے بلے بازی کی اور ہندوستان نے جارح گیند بازی اورچست فیلڈنگ کی بدولت پہلے ویمنز انڈر 19 ٹی 20 ورلڈ کپ کے فائنل میں اتوار کو انگلینڈ کو محض 68 رن پر آؤٹ کر دیا۔ ہندوستان کو خطاب جیتنے کے لیے 20 اووروں میں 69 رن درکار تھے جو انہوں نے تین وکٹ کے نقصان پر بنا لئے۔

انگلش لڑکیاں تیتاس سادھو ( چھ رن پر دو وکٹ)، ارچنا دیوی ( 17 رن پر دو وکٹ ) اور پارشوی چوپڑا ( 13 رن پر دو کٹ) کی تکڑی کے سامنے پانی بھرتی نظر آئیں۔ اس کے ساتھ ہی منت کشیپ، شیفالی ورما اور سونم یادو نے ایک ایک وکٹ حاصل کیا اور مقررہ اوور سے پہلے 17 گیندوں پر انگلینڈ کا پلندہ برابر کرنے میں اہم کردار ادا کیا۔

کپتان شیفالی نے ٹاس جیت کر انگلینڈ کو پہلے بیٹنگ کی دعوت دی تھی ، جس کا جواز پیش کرتے ہوئے سادھو نے انگلینڈ کے اوپنر لبرٹی ہیپ کو اپنے پہلے ہی اوور میں صفر پر آؤٹ کر دیا۔ بعد ازاں نیمہ ہالینڈ نے رن ریٹ کو تیز کرنے کی کوشش کی لیکن کامیاب نہ ہو سکیں۔

وقفے وقفے سے وکٹ گرنے کی وجہ سے پہلے دس اووروں میں انگلینڈ کی آدھی ٹیم 39 رن کا اضافہ کر کے پویلین لوٹ چکی تھی۔ ہندوستانی گیند بازوں نے اس حد تک تباہی مچائی کہ چھ انگلش کھلاڑی دوہرا ہندسہ بھی نہ بنا سکیں۔ ریان میکڈونلڈ-گی (19)، الیکسا اسٹون ہاؤس (11)، صوفیہ اسمیل (11) اور نیاہ ہالینڈ (10) ہی کچھ دیر کریز پر ٹھہرے رہے کیونکہ انگلینڈ نے 17.1 اووروں میں 68 رن بنائے۔