چرکھی دادری،15/اکتوبر(آئی این ایس انڈیا)وزیر اعظم نریندر مودی نے منگل کو ہریانہ کے چرکھی دادری میں ایک انتخابی ریلی سے خطاب کرتے ہوئے کہا کہ 70 سال تک آپ کا پانی پاکستان جاتا رہا۔یہ مودی اس کوروکے گا، میں نے اس پر کام شروع کر دیا ہے۔ساتھ ہی پی ایم مودی نے کہاکہ میں دو دن سے ہریانہ میں ہوں۔ہوا کے رخ کا پتہ چل رہا ہے۔بی جے پی دوبارہ ہریانہ کی خدمت کرے گی، یہ عوام نے فیصلہ کر لیا ہے۔کبھی دو تین سیٹوں والی بی جے پی آج ہریانہ میں مسلسل دوسری بار حکومت بنانے کی پوزیشن میں آپ سب کی بدولت اور محبت کی وجہ سے پہنچی ہے۔پاکیزگی، محنت اور ایمانداری پر آج ہریانہ کی عوام مہر لگا رہی ہے۔ پی ایم مودی نے کہاکہ ہریانہ میں میں انتخابی ریلی کے لئے نہیں آتا ہوں،اور نہ میں یہاں پرچارکرتا ہوں اور نہ میں یہاں ووٹ مانگتا ہوں۔ ہریانہ مجھے کھینچ کے لے آتا ہے، اتنا پیار آپ نے مجھے دیا ہے۔مجھے یہاں سے ایک توانائی ملتی ہے۔ترقی کو ذہن میں رکھ کر، قومی مفاد کو ذہن میں رکھ آپ کے ووٹ نے بانٹنے والی سیاست کو شکست خوردہ کر دیا ہے۔ہریانہ نے جو سوفیصد حمایت اس بار لوک سبھا انتخابات میں بی جے پی کو دی ہے، اس کا اثر آج دکھائی دے رہا ہے۔ہریانہ کا یہ علاقہ اب 4-5 نیشنل ہائی وے سے جڑ گیا ہے، نئے میڈیکل کالج یہاں بن رہے ہیں۔یہ سب تب ہو رہا ہے جب آپ نے ڈبل انجن لگایا۔دہلی میں نریندر مودی کا انجن اور ہریانہ میں منوہر لال جی کاانجن۔وزیر اعظم نے اس کے علاوہ کہاکہ ہمارے گاؤں ملک میں ہو رہی سماجی تبدیلی کو رفتار دے رہے ہیں۔ہمارے گاؤں ہی اپنی ثقافت اور روایات کو برقرار رکھتے ہوئے معاشرے کو نئی سوچ اور نئے راستے پر لے جا رہے ہیں۔ملک کے دیہات نے ہی کھلے میں قضائے حاجت سے نجات کا عزم ثابت کیا۔ہمارے گاؤں ہی پانی زندگی مہم میں ہر گھر تک پانی پہنچانے کے مشن میں اہم کردار ادا کر رہے ہیں۔