پلازما کے ذریعہ کورونا متاثرین کی زندگیاں بچارہے ہیں تبلیغی جماعت سے وابستہ افراد
نئی دہلی،28؍اپریل(ایس او نیوز؍ایجنسی) ملک میں کورونا وائرس کا سب سے زیادہ شکار ہوئی تبلیغی جماعت کے لوگ اب کورونا متاثرین کی مدد کیلئے آگے آئے ہیں - تبلیغی جماعت سے منسلک افراد نے اپنا پلازما عطیہ کرنا شروع کردیا ہے-
دہلی کے سلطانپوری کوارنٹائن سینٹر میں موجود 4 تبلیغی جماعت سے منسلک افرادنے اپنا پلازما عطیہ کیا ہے- کوئی ویکسین اور دوائی نہ ہونے کی پریشانی جھیل رہی دنیا میں پلازما تھیریپی کو اپنایا جارہا ہے- تبلیغی جماعت سے منسلک افرادکے پلازما کو ٹرائل میں کام میں لایا جائیگا اور اس تھیریپی کے ذریعے کورونا وائرس سے متاثر مریضوں کی مدد کی کوشش کی جائیگی-
تفصیلات کے مطابق تبلیغی جماعت کے لوگ رمضان المبارک کے پاک مہینے میں کورونا وائرس سے متاثرہ مریضوں کی مدد کیلئے آگے آئے اور دہلی کے اسپتالوں میں اپنا روزہ کھولنے کے بعدجانچ کیلئے خون کے نمونے دیئے، جن میں سے تقریباً 300 تبلیغی جماعت کے افراد منفی پائے گئے، نریلا میں تبلیغی جماعت کے 190 مریض ہیں، سلطان پوری میں 51 اور منگلول پوری میں تبلیغی جماعت سے وابستہ 42 افراد موجود ہیں -
معلومات کے مطابق دہلی کے اسپتالوں میں 1068 کورونا سے متاثر تبلیغی جماعت کے افراد موجود ہیں، جن میں سے تقریباً 300 جماعت کے افراد کی دوبارجانچ کے بعد منفی رپورٹ آئی ہے، جس کے بعد یہ تمام افراد کورونا سے متاثر مریضوں کی مدد کیلئے تیار ہیں -