ہندوستان نے چین میں میڈیکل تعلیم حاصل کرنے کے خواہش مند طلباء کو کیا آگاہ، جاری کی ایڈوائزری
بیجنگ ، 11؍ستمبر (ایس او نیوز؍ایجنسی) ہندوستان نے چین میں طب کی تعلیم حاصل کرنے کے خواہشمند طلبا ء کے لیے ایک تفصیلی کونسلنگ /ایڈوائزری جاری کی ہے، جس میں انہیں چین میں تعلیم حاصل کرنے کے بعد درپیش کئی مسائل سے خبردار کیا گیا ہے۔ کونسلنگ میں طلبا ء کوٹیسٹ پاس ہونے کی کم فیصد، سرکاری زبان پوتونگھوا سیکھنے کی مجبوری اور ہندوستان میں ڈاکٹر کے طور پر پریکٹس کرنے کے سخت قوانین کے بارے میں بتایا گیا ہے۔ یہ ایڈوائزری ایک ایسے وقت میں جاری کی گئی ہے جب چین کے طبی اداروں میں زیر تعلیم متعدد ہندوستانی ء طلبا بیجنگ کی کووڈ ویزا پابندیوں کی وجہ سے دو سال سے زیادہ عرصے سے گھر پر بیٹھے ہیں۔
سرکاری تخمینے کے مطابق، اس وقت چین کی مختلف یونیورسٹیوں میں 23,000 سے زیادہ ہندوستانی طلبا ء داخلہ لے رہے ہیں، جن میں سے ایک بڑی تعداد میڈیکل کے طالب علموں کی ہے۔ چین نے حال ہی میں دو سال سے زائد کوویڈ ویزا پابندیوں کے بعد طلبا ء کو منتخب کرنے کے لیے واپسی کے ویزے جاری کیے ہیں۔ لیکن ان میں سے زیادہ تر طلبا ء واپس آنے کے لیے جدوجہد کر رہے ہیں کیونکہ براہ راست پروازیں دستیاب نہیں ہیں اور بیجنگ میں قرنطینہ کی پابندیوں کے پیش نظر دونوں ممالک کے درمیان پرواز کی محدود سہولات کے لیے بات چیت جاری ہے۔
دریں اثنا، چینی میڈیکل کالجوں نے ہندوستان اور بیرون ملک سے نئے طلبا ء کو داخلہ دینا شروع کر دیا ہے۔ اس تناظر میں، بیجنگ میں ہندوستانی سفارت خانے نے جمعرات کو ان طلباء کے لیے ایک تفصیلی ایڈوائزری جاری کی ہے جو چین میں طب کی تعلیم حاصل کرنا چاہتے ہیں۔ کونسلنگ ان مشکلات سے نمٹتی ہے جن کا چین میں تعلیم حاصل کرنے والے ہندوستانی طلبا ء کو سامنا کرنا پڑ سکتا ہے۔ اس کے علاوہ، تعلیم کے بعد ہندوستان میں طب کی مشق کرنے کے لیے انہیں جو قابلیت حاصل کرنی ہوگی، اس کے بارے میں بھی سخت قوانین کی جانکاری بھی دی گئی ہے۔ ایڈوائزری میں کہا گیا ہے کہ ہندوستان میں پریکٹس کے لیے، 2015 اور 2021 کے درمیان، صرف 16 فیصد طلبہ ہی امتحان پاس کر سکے۔
اس مدت کے دوران، 40,417 طلبا ء میں سے صرف 6,387 طلبا ء ہی میڈیکل کونسل آف انڈیا (MCI) کے ذریعہ منعقدہ غیر ملکی میڈیکل گریجویٹ (FMG) امتحان میں کوالیفائی کر سکے۔ ایڈوائزری میں کہا گیا کہ 2015 اور 2021 کے درمیان، 45 تسلیم شدہ چینی یونیورسٹیوں سے کلینیکل میڈیسن کورسز پڑھنے والے ہندوستانی طلبا ء میں سے صرف 16 فیصد پاس ہوسکے۔
ایڈوائزری میں کہا گیا ہے کہ جو والدین اپنے بچوں کو چینی یونیورسٹیوں میں بھیجنا چاہتے ہیں انہیں اس حقیقت کا ادراک کرنا چاہیے۔ اس کے علاوہ سفارت خانے کی جانب سے جاری ایڈوائزری میں یہ بھی کہا گیا ہے کہ ہر یونیورسٹی کی فیس مختلف ہے اور وہ داخلہ لینے سے پہلے براہ راست یونیورسٹی سے رابطہ کریں۔