تِھمپو،18اگست(ایس او نیوز؍یو این آئی) وزیر اعظم نریندر مودی نے بھوٹان میں ترقیاتی پروجیکٹوں میں اہم شراکت داری کا ذکر کرتے ہوئے کہا کہ ہندوستان وہاں کی پانچ سالہ منصوبوں میں مسلسل تعاون کرتا رہے گا۔ وہ بھوٹان کے دو روزہ دورے پر آج یہاں پہنچے۔ انہوں نے بھوٹان کے وزیر اعظم لوتیہ شیرنگ کے ساتھ وفد کی سطح کامذاکرہ کیا۔ دونوں فریقوں نے مختلف شعبوں میں حصہ داری اور تعاون بڑھانے کے مختلف قراروں پر تفصیلی گفتگو کی۔ اس کے بعد دونوں رہنماؤں کی موجودگی میں سائنس، ٹیکنالوجی، انجینیئرنگ، حساب اور انصاف کے شعبوں میں تعاون کے قراروں پر دستخط کیے گئے۔ مشترکہ طور پر دونوں وزراء اعظم نے 7200میگا واٹ کی مینگدیچھو پَن بجلی پروجیکٹ کا افتتاح کیا۔ دونوں رہنماؤں نے ہندوستان کے نیشنل نالج نیٹ ورک اور بھوٹان کے ڈرک ریسرچ اور ایجوکیشن نیٹ ورک کے درمیان رابطہ پروگرام کا بھی افتتاح کیا۔ مودی نے ہندوستان کے روپے کارڈ کو بھی لانچ کیا۔ سنگاپور کے بعد بھوٹان دوسرا ملک ہے جہاں روپے کارڈ لانچ کیا گیا ہے۔ بعد ازاں مسٹر شیرنگ کے ساتھ مشترکہ طور پر میڈیا سے خطاب کرتے ہوئے مودی نے کہا کہ 130/کروڑ ہندوستانیوں کے دلوں میں بھوٹان ایک خاص مقام رکھتا ہے۔ انہوں نے کہا،یہ ہندوستان کی خوش بختی ہے کہ ہم بھوٹان کی ترقی میں اہم شراکت دار ہیں۔ بھوٹان کے پانچ سالہ پروجیکٹوں میں ہندوستان کا تعاون آپ کی خواہشات و ترجیحات کی بنیاد پر مستقبل میں بھی جاری رہے گا۔ مودی نے کہا کہ بھوٹان کے عام آدمی کی بڑھتی ضرورتوں کو پورا کرنے کے لئے ہندوستان سے رسوئی گیس کی سپلائی 700سے بڑھا کر 1000ٹن فی ماہ کی جارہی ہے۔ اس سے گاوؤں تک صاف ایندھن پہنچانے میں مدد ملے گی۔ انہوں نے کہا کہ سارک کرنسی سویپ فریم ور ک کے تحت بھوٹان کی خاطر کرنسی سویپ کی حد بڑھانے کے بارے میں ہندوستان کا موقف مثبت ہے۔ غیرملکی کرنسی کی ضرورت کو پورا کرنے کے لئے اسٹینڈ بائے سویپ نظام کے تحت ہندوستان بھوٹان کو 10/کروڑ ڈالر کی رقم مہیا کرائے گا۔ انہوں نے کہا کہ ہندوستان اسپیس ٹیکنالوجی کے ذریعے بھوٹان کی ترقی میں تیزی لانے کے لیے پابند عہد ہے۔ اسی مقصد سے ساؤتھ ایشیا سیٹلائٹ کے ارتھ اسٹیشن کا افتتاح کیا گیا ہے۔ اس سے بھوٹان میں کمیونکیشن (مواصلات) پبلک براڈکاسٹنگ اور قدرتی آفات کے انتظام کے شعبوں میں کافی مدد ملے گی۔ انہوں نے کہا کہ موجودہ حالات اور ضروریات کے پیش نظر ہندوستان کے انسٹی ٹیوٹس آف ٹیکنالوجی اور دیگر ٹاپ تعلیمی اداروں کے درمیان تعاون بڑھایا جارہا ہے۔ وزیر اعظم نے کہا کہ بھوٹان میں روپے کارڈ کے لانچ ہونے سے ڈیجیٹل ادائیگی، تجارت اور سیاحت کے شعبے میں ہمارے تعلقات مزید بڑھیں گے۔ انہوں نے کہا،ہندستان۔بھوٹان تعلقات کی تاریخ جتنی پُر فخر ہیں اتنی ہی پرامید مستقبل بھی ہے۔ ہماری مشترکہ روحانی وراثت اور مضبوط رابطہ عامہ ہمارے تعلقات کی جان ہے۔ مجھے یقین ہے کہ ہندوستان اور بھوٹان دنیا میں دو ملکوں کے تعلقات کی ایک انوکھی مثال رہیں گے۔ مودی نے کہا کہ انھیں اتوار کو رائل بھوٹان یونیورسٹی کے قابل نوجوانوں سے ملاقات کرنے کا بے صبری سے انتظار ہے۔