نئی دہلی،28؍مارچ (ایس او نیوز؍ایجنسی) ہندوستان نے ٹسٹ اور ٹی-20 کے بعد ونڈے سیریز بھی جیت لی ہے۔  ہندوستان نے تیسرے ونڈے میں انگلینڈ کو دلچسپ مقابلے میں 7 رنوں  سے شکست دی۔ اس کے ساتھ  ہندوستان نے سیریز پر 1-2 سے قبضہ کرلیا۔ ہندوستان نے گھر میں انگلینڈ کو مسلسل چھٹے ونڈے سیریز میں  شکست دی  ہے۔ اس سے پہلے  ہندوستان نے ٹسٹ سیریز 1-3 سے جبکہ ٹی-20 سیریز 2-3 سے جیتی تھی۔ یعنی ہندوستان نے ہیٹ ٹرک سیریز جیتی۔

330 رنوں کے ہدف کا تعاقب کرنے اتری انگلش ٹیم کی شروعات اچھی نہیں رہی۔ تیزگیند باز بھونیشور کمار نے انگلش اننگ کے پہلے اوور کی آخری گیند پر جیسن رائے (14) کو آوٹ کیا۔ اس کے بعد بھونیشور کمار نے جانی بیرسٹو (1) کو آوٹ کرکے ٹیم کو بڑی کامیابی دلائی۔ بیرسٹو نے دوسرے ونڈے میں شاندار 124 رن بنائے تھے۔ اس کے علاوہ پہلے ونڈے میں بھی انہوں نے 94 رنوں کی بڑی اننگ کھیلی تھی۔

28 رنوں پر دو وکٹ گرنے کے بعد بین اسٹوکس (35) نے کچھ اچھے شاٹ لگائے۔ انہیں ایک جیون دان بھی ملا، لیکن وہ اس کا فائدہ نہیں اٹھا سکے۔ بین اسٹوکس کو بائیں ہاتھ کے تیز گیند باز ٹی نٹراجن نے آوٹ کیا۔ ڈیوڈ ملان (50) اور لیام لونگسٹن (36) نے پانچویں وکٹ کے لئے 60 رن جوڑے۔ مڈل اوور میں شاردل ٹھاکرنے تین وکٹ دلاکر انگلش ٹیم کو پیچھے دھکیل دیا۔ معین علی نے بھی 29 رن بنائے۔ 200 رنوں پر 7 وکٹ گرنے کے بعد سیم کرن (95 رن ناٹ آوٹ) اور عادل رشید نے 57 رنوں کی شراکت کرکے واپسی کی کوشش کی۔ سیم کرن نے ٹیم کو جیت کی دہلیز تک پہنچا دیا تھا، لیکن ٹیم نزدیکی مقابلے میں ہارگئی۔ ہندوستان کے کھلاڑیوں نے خراب فیلڈنگ کی اور 4 کیچ چھوڑے۔ 49 ویں اوور میں شاردل ٹھاکر اور نٹراجن نے کیچ چھوڑا۔ آخری اوور میں انگلینڈ کو جیت کے لئے 14 رن بنانے تھے، لیکن انگلش ٹیم صرف 6 رن ہی بناسکی۔  انگلینڈ نے 50 اوور کے بعد 9 وکٹ پر 322 رن بنائے۔ تیز گیند باز شاردل ٹھاکرنے سب سے زیادہ 4 وکٹ لئے۔ بھونیشور کمار کو بھی 3 وکٹ حاصل ہوئے۔