نئی دہلی؍چینئی،13؍نومبر(ایس او نیوز؍ ایجنسی) ہندوستانی کرکٹ ٹیم نے 3 میچوں کی ٹی۔20 سیریز کے آخری میچ میں ویسٹ انڈیز کو 6 وکٹ سے شکست دے کر سیریز 3۔0 سے جیت لی ہے۔

چینئی میں کھیلے گئے سیریز کے آخری میچ میں مہمان ٹیم ویسٹ انڈیز کے کپتان دنیش رامدین نے ٹاس جیت کر پہلے بیٹنگ کا فیصلہ کیا اور اسکور بورڈ پر ایک معقول مجموعہ ترتیب دیا۔ شائی ہوپ اور ہیتمیر نے 51 ر ن کااچھا آغاز فراہم کیا جس کو ڈیرن براوو اور نیکولس پوران نے آگے بڑھایا۔ویسٹ انڈیز کی پہلی وکٹ شائی ہوپ کی صورت میں گری تھی جنہوں نے 24 رن بنائے اور ہیتمیر نے 26 رن بنائے جس کے بعد کپتان رامدین 94 کے اسکور پر 15 رن کا اضافہ کرکے پیویلیئن لوٹے۔براوو اور پوران نے مقررہ 20 اوور تک کھیل جاری رکھا اور ٹیم کا مجموعہ 181 رن پہنچا دیا اور بالترتیب 43 اور 53 رن بنا کر ناٹ آؤٹ رہے۔ ہندوستان کے اسپن گیند باز چہل نے 2 اور واشنگٹن سندر نے ایک وکٹ حاصل کی۔ ہندوستان کو ہدف کے تعاقب میں 13 رن پر روہت شرما کی وکٹ سے ہاتھ دھونا پڑا وہ صرف 4 رن بنا کر آؤٹ ہوئے جس کے بعد راہل نے 17 رن بنا کر شکھردھون کا 45 رن تک ساتھ دیا تاہم تھامس نے ان کو آؤٹ کردیا۔دھون اور ریشبھ پنت نے تیسرے وکٹ کی شراکت میں 130 رن کا اضافہ کیا۔ پنت 58 رن بنا کر آؤٹ ہوئے اور دھون 62 گیندوں پر 92 رن بنا کر میچ کے اختتام سے محض ایک گیند قبل آؤٹ ہوئے۔ ہندوستان نے آخری گیند پر ایک رن حاصل کر کے یہ معرکہ اپنے نام کیا۔ کپتان کارتک صفر اور پانڈیا 4 رن بنا کر ناقابل شکست رہے۔ ہندوستان نے 6 وکٹ سے یہ میچ جیت کر سیریز بھی 3۔0 سے اپنے نام کرلی۔شکھر دھون کو شاندار 92 رن کی اننگز کھیلنے پر میچ کا بہترین کھلاڑی قرار دیا گیا۔

اس سے قبل نکولس ناقابل شکست 53رن اور ڈیرین براوو ناقابل شکست43رن بناکر ویسٹ انڈیز کو181کا چیلنجنگ اسکور بنانے میں مدد کی۔ ویسٹ انڈیز نے پہلے 2میچوں کے مقابلے میں بہتر کارکردگی کا مظاہرہ کیا۔ویسٹ انڈیز نے تیز شروعات کی، مڈل اوور میں لڑکھڑانے کے بعد سنبھلتے ہوئے اس نے ایک اچھا اسکور کیا۔پوران نے اپنی پہلی ٹی۔ 20 نصف سنچری بنائی۔انہوں نے 4چوکے اور4چھکے لگائے۔پوران اور براوو نے چوتھے وکٹ کی ناٹ آؤٹ پارٹنر شپ میں محض 43گیندوں میں87رن بنا ڈالے ۔ ہندوستان کی جانب سے یجویندر چہل نے پلے شائی ہوپ کو پھر ہیتمیر کو آؤٹ کرکے ویسٹ انڈیز کا اسکور 9اوور میں 2وکٹ پر 62رن کردیا۔براوو اور پوران نے اس کے بعد مضبوط ساجھیداری کی اور کچھ اچھے شاٹ لگائے۔ براوو نے خلیل احمد کے آخری اوو کی پہلی گیند پر چھکا لگایا۔ پوران پھر چوکا ، چھکا اور چوکا لگاتے ہوئے اپنی پہلی ٹی۔20نصف سنچری مکمل کرلی۔ اس اوور میں کل 23رن بنے جس نے ویسٹ انڈیز کے اسکور کو مضبوط کردیا۔ خلیل احمد کے آخری اوور نے ان کا اسپیل بگاڑ دیا اور ان کے 4اوور سے 37رن بنے۔ چہل نے28رن پر 2وکٹ اور سندر نے 33رن پر ایک وکٹ لیا۔ بھونیشور نے 4اوور میں39اور کرنال پانڈیا نے4اوور میں 40رن دیئے۔