پہلے ٹسٹ میں ہندوستان نے بنگلہ دیش کو اننگز اور 130 رن سے شکست دی

Source: S.O. News Service | Published on 16th November 2019, 8:27 PM | اسپورٹس |

اندور،16/نومبر(ایس او نیوز/یو این آئی) تیز گیند باز محمد سمیع (31 رن پر 4 وکٹ) اور آف اسپنر روی چندرن اشون (42 رن پر تین وکٹ) کی بہترین گیند بازی کی بدولت ہندوستان نے بنگلہ دیش کو پہلے کرکٹ ٹسٹ کے تیسرے ہی دن اننگز اور 130 رنوں سے شکست دے کر دو میچوں کی سیریز میں 1۔0 کی برتری حاصل کرلی۔ ہندوستان نے اپنی پہلی اننگز تیسرے دن کھیل کے آغاز سے قبل کل کے چھ وکٹ پر 493 رن پر اعلان کر دی۔ بنگلہ دیش نے پہلی اننگز کے مقابلے دوسری اننگز میں کچھ بہتر کارکردگی کا مظاہرہ کیا لیکن پوری ٹیم دن کے آخری سیشن میں 69.2 اوور میں 213 رن پر سمٹ گئی۔ ہندوستان نے اس طرح یہ مقابلہ اننگز اور 130 رن سے جیت لیا۔

ہندوستان کی جیت میں اس کے گیند بازوں کا اہم تعاون رہا۔ سمیع نے 31 رن پر چار وکٹ لے کر میچ میں سات وکٹ مکمل کیے۔ اشون نے 42 رن پر تین وکٹ لے کر میچ میں پانچ وکٹ حاصل کیے۔ امیش یادو نے 51 رن پر دو وکٹ لے کر میچ میں چار وکٹ حاصل ہوئے جبکہ ایشانت شرما کو 31 رن پر ایک وکٹ ملا۔ بنگلہ دیش کی دوسری اننگز میں مشفق الرحیم نے یک طرفہ جدوجہد کرتے ہوئے 150 گیندوں پر سات چوکوں کی مدد سے 64 رن بنائے جبکہ لٹّن داس نے 35 اور مہدی حسن نے 38 رن بنائے۔ مہمان ٹیم اپنے پہلے پانچ وکٹ 72 رن پر گنوانے کے بعد گھٹنے ٹیک بیٹھی اور تیسرے ہی دن اس کا بوریا بستر بندھ گیا۔

ہندوستان کو اس میچ کو جیتنے سے 60 پوائنٹس حاصل ہوئے اور اب اس کے آئی سی سی ٹیسٹ چیمپئن شپ میں 300 پوائنٹس پورے ہو گئے ہیں۔ دنیا کی نمبر ایک ٹیم ہندوستان پہلی ایسی ٹیم ہے جس نے ٹیسٹ چیمپئن شپ میں 300 پوائنٹس مکمل کرلئے ہیں۔

یہ اس طرح کا مسلسل تیسرا ٹیسٹ ہے جس میں ہندوستان نے اننگز سے کامیابی حاصل کی ہے۔ ہندوستان نے اس سے پہلے جنوبی افریقہ کو رانچی میں اننگز اور 202 رنوں سے اور اسی ٹیم کو پونے میں اننگز اور 137 رن سے شکست دی تھی۔ اس سے قبل ہندوستان نے 1993۔94 کے سیشن میں سری لنکا کے خلاف مسلسل تین میچ اننگز کے فرق سے جیتے تھے۔ اس سے قبل ہندوستان نے 1992۔93 میں انگلینڈ کو دو بار اننگز اور زمبابوے کو اننگز سے شکست دے کر مسلسل تین میچ، اننگز کے فرق سے جیتے تھے۔

اس جیت کے ساتھ وراٹ کوہلی نےمہندر سنگھ دھونی کا سب سے زیادہ نو میچ، اننگز کے فرق سے جیتنے کا ریکارڈ توڑ دیا۔ وراٹ اپنی کپتانی میں اب 10 میچ، اننگز کے فرق سے جیت چکے ہیں۔ دھونی نے نو میچ، محمد اظہرالدین نے آٹھ میچ اور سورو گنگولی نے سات میچ اننگز کے فرق سے جیتے تھے۔ ہندوستان کی یہ مسلسل چھٹی کامیابی ہے۔ اس سے قبل ہندوستان نے 2013 میں دھونی کی کپتانی میں مسلسل چھ ٹیسٹ جیتے تھے جس میں چار آسٹریلیا اور دو ویسٹ انڈیز کے خلاف تھے۔ دوسری جانب غیر ملکی زمین پر بنگلہ دیش کی خراب کارکردگی جاری ہے اور غیر ملکی زمین پر گزشتہ چھ ٹسٹ میچوں میں یہ اس کی اننگز سے پانچویں شکست ہے۔

یہاں هولكر اسٹیڈیم میں ٹیم انڈیا کے حملے کے سامنے بنگلہ دیشی ٹیم دوسری اننگز میں بھی سنبھل نہیں پائی اور لنچ تک اس نے صرف 60 رن پر اپنے چار ابتدائی وکٹ گنوا دیئے۔ بنگلہ دیش نے چائے کے وقفہ تک چھ وکٹ گنوائے اور آخری سیشن میں اس نے باقی چار وکٹ کھو دیئے۔ ہندوستان نے اوپنر مینک اگروال کی 243 رن کی دوہری سنچری کی بدولت پہلی اننگز میں 114 اوور میں چھ وکٹ پر 493 رن بنائے تھے اور تیسرے دن کا کھیل شروع ہونے سے قبل ہی اپنی اننگز کا اعلان کر دیا، جس سے ہندوستان کی پہلی اننگز کی بنیاد پر مجموعی برتری 343 رن پہنچ گئی۔ میدان پر دوسری اننگز کے لئے اتری بنگلہ دیشی ٹیم کی ایک بار پھرشروعات کافی خراب رہی اور اس ٹاپ آرڈر کے بلے باز سستے میں نمٹ گئے۔

تیز گیند باز امیش یادو نے امرألقیس (6) کو بولڈ کرکے ہندوستان کو چھٹے اوور کی پہلی گیند پر ہی پہلا وکٹ دلا دیا۔ ایشانت شرما نے پھر دوسرے اوپننگ بلے باز شادمان اسلام کو بولڈ کیا جو 6 رن پر ہی بنا سکے تھے۔ کپتان مومن الحق نے 20 گیندوں میں ایک چوکا لگا کر سات رن بنائے ہی تھے کہ محمد سمیع نے انہیں ایل بی ڈبلیو کرکے 37 رن پر بنگلہ دیش کے تین وکٹ لئے لئے۔ لنچ سے پہلے سمیع نے ایک اور کامیابی محمد متھن کے طور پر دلائی جنہوں نے 26 گیندوں میں چار چوکے لگا کر 18 رن بنائے۔ سمیع نے مینک کے ہاتھوں متھن کو کیچ کرایا۔ بنگلہ دیشی ٹیم کے نچلے آرڈر کے بلے بازوں نے اگرچہ ٹکنے کا جذبہ دکھایا اور مشفق الرحیم نے 150 گیندوں میں سات چوکوں کی مدد سے 64 رن کی اننگز کھیلی۔

مشفق نے لٹن کے ساتھ چھٹے وکٹ کے لئے 63 رن اور مہدی حسن کے ساتھ ساتویں وکٹ کے لیے 59 رنوں کی نصف سنچری شراکت داری سے اپنی ٹیم کو سنبھالنے کی کوشش کی۔ اشون نے مشفق کو آؤٹ کرکے ہندوستان کو نواں وکٹ دلایا۔ ان سے پہلے محمدالله نے 35 گیندوں میں دو چوکے لگا کر صرف 15 رنوں کا اضافہ کیا اور لنچ کے بعد سمیع نے انہیں اپنا تیسرا شکار بنایا۔ لٹن داس اگرچہ کچھ دیر ٹک کر کھیلتے رہے اور 39 گیندوں میں چھ چوکے لگا کر انہوں نے 35 رن بنائے ہی تھےکہ آف اسپنر روی چندرن اشون نے اپنی گیند پر انہیں کیچ کرتے ہوئے چھٹے بلے باز کے طور پر انہیں پویلین روانہ کردیا۔

ایک نظر اس پر بھی

حیدرآباد نے آئی پی ایل کا سب سے بڑا اسکور بنایا ، ممبئی کو 31 رنز سے دی بری طرح شکست

آئی پی ایل 2024 کے 8ویں میچ میں سن رائزرز حیدرآباد نے ممبئی انڈینز کو 31 رنز سے شکست دے دی۔ میچ میں حیدرآباد نے پہلے بیٹنگ کرتے ہوئے مقررہ 20 اوورز میں 3 وکٹوں پر 277 رنز بنائے۔ جواب میں ممبئی کی ٹیم 20 اوورز میں 246/5 ​​رنز ہی بنا سکی۔ تلک ورما نے ممبئی کے لیے کافی دیر کوشش کی اور 64 رنز کی ...

آئی پی ایل 2024: دفاعی چمپئن چنئی نے جیت کے ساتھ کیا آغاز، بنگلورو کو 6 وکٹ سے ملی شکست

آج آئی پی ایل 2024 کا پہلا میچ دفاعی چمپئن چنئی سپرکنگز (سی ایس کے) اور رائل چیلنجرس بنگلور (آر سی بی) کے درمیان کھیلا گیا جس میں چنئی کو 6 وکٹ سے جیت ہاتھ لگی ہے۔ بنگلورو نے چنئی کے سامنے جیت کے لیے 174 رنوں کا ہدف رکھا تھا جسے اس نے 18.4 اوورس میں محض 4 وکٹ کے نقصان پر حاصل کر لیا۔ اس ...

ہندوستان نے پانچویں ٹیسٹ میں انگلینڈ کو اننگ اور 64 رن سے شکست ، سیریز پر 4-1 سے قبضہ

دھرم شالہ میں کھیلے جا رہے پانچویں ٹیسٹ میچ میں ہندوستان نے انگلینڈ کو اننگز اور 64 رنز سےشکست دی  ہے۔ اس طرح ہندوستان نے سیریز 4-1 سے جیت لی۔ ہندوستانی ٹیم نے میچ کے تیسرے دن انگلینڈ کو بڑی شکست دی۔ انگلینڈ کی ٹیم دوسری اننگز میں بھی بری طرح لڑکھڑا گئی۔ صرف جو روٹ ہی بلے سے کچھ ...

ہندوستان نے دوسرے ٹیسٹ میں انگلینڈ کو 106 رنوں سے دی شکست، سیریز 1-1 سے برابر

) ہندوستان نے پہلے ٹیسٹ میچ میں انگلینڈ سے ملی شکست کا بدلہ آج وشاکھاٹنم میں لے کر سیریز کو 1-1 سے برابر کر دیا ہے۔ 5 ٹیسٹ میچوں کی سیریز کا دوسرا ٹیسٹ ہندوستان نے 106 رنوں سے جیت لیا ہے۔ اس جیت کے ہیرو پلیئر آف دی میچ جسپریت بمراہ رہے جنھوں نے دونوں اننگ میں مجموعی طور پر 9 ...

کیپ ٹاؤن میں ہندوستان کی جنوبی افریقہ پر تاریخی فتح، میچ دوسرے ہی دن ختم، ٹیسٹ سیریز 1-1 سے برابر

ہندوستانی مینس کرکٹ ٹیم نے 2024 کا آغاز ایک شاندار اور ریکارڈ ساز جیت کے ساتھ کیا ہے۔ کیپ ٹاؤن کے نیولینڈس میں 3 جنوری سے شروع ہوا ٹیسٹ میچ 4 جنوری یعنی دوسرے دن ہی ختم ہو گیا۔ ہندوستان کو جیت کے لیے دوسری اننگ میں 79 رنوں کا ہدف ملا تھا جسے روہت بریگیڈ نے محض 3 وکٹ کے نقصان پر حاصل ...

جنوبی آفریقہ نے پہلے ٹیسٹ میں انڈیا کو دی ایک اننگ اور 32 رنوں سے شکست

جنوبی افریقہ کے خلاف دو ٹیسٹ میچوں کی سیریز کا پہلا ٹیسٹ ہندوستانی ٹیم ایک اننگ اور 32 رنوں سے ہار گئی ہے۔ اس شرمناک شکست کا ذمہ دار ہندوستانی بلے باز اور گیندبازوں دونوں رہے، کیونکہ پہلی اننگ میں کسی طرح 245 رن کا اسکور بنانے کے بعد ہندوستانی ٹیم دوسری اننگ میں محض 131 رنوں پر ...