عالمی کپ 2019: افغانستان پرہندوستان کی 11 رنوں سے جیت، محمد شامی نے بنائی ہیٹ ٹرک
ساؤتھیمپٹن،22؍جون(ایس او نیوز؍ایجنسی) ہندوستان نے ہفتہ کے روز ’دی روز باؤل‘ کے میدان پر کھیلے گئے آئی سی سی عالمی کپ 2019 کے میچ میں افغانستان کو دلچسپ مقابلہ میں 11 رنوں سے ہرا دیا۔ افغانستان نے گیند سے بہترین کارکردگی کا مظاہرہ کر کے ہندوستان کو 50 اووروں میں 8 وکٹ کے نقصان پر 224 رنوں تک محدود کر دیا، لیکن اس کے بلے باز ہدف حاصل کرنے میں ناکام رہے اور 49.5 اووروں میں 213 رنوں پر آل آؤٹ ہو گئے۔
ہدف کا تعاقب کرتے ہوئے افغانستان کے کھلاڑیوں نے ایک لمحہ کے لئے بھی ہار نہیں مانی اور وقفہ وقفہ پر شراکت داریاں کر کے خود کو میچ میں برقرار رکھا اور میچ کو آخری اوور تک لے کر گئے۔
محمد شامی نے آخری اوور کی تین گیندوں میں تین وکٹ کے ساتھ 4 وکٹ حاصل کئے اس کے علاوہ جسپریت بمراہ، یجویندر چہل، اور ہاردک پانڈیا نے دو دو وکٹ حاصل کئے۔ افغانستان کے لئے محمد نبی نے 52، رحمت شاہ نے 36 اور گلبدین نے 27 رن بنائے۔
225 رنوں کا تعاقب کرنے اتری افغانستان کو آخری اوور میں 16 رن درکار تھے۔ نبی نے پہلی گیند پر چوکا لگاکر اپنی نصف سنچری مکمل کی اور ہندوستان کی پیشانی پر شکن ڈال دی لیکن شامی نے اگلی گیند خالی نکالی اور اوور کی تیسری گیند پر نبی کو لاگ آن پر ہاردک پانڈیا کے ہا تھوں کیچ کرا کر میچ کو ہندوستان کے حق میں کر دیا۔
اگلی دو گیندوں پر شامی نے آفتاب عالم اور مجیب الرحمان کے وکٹ لے کر افغانستان کو 49.5 اوور میں 213 رنوں پر محدود کر دیا اور ہندوستان کو اس عالمی کپ میں چوتھی جیت سے ہم کنار کر دیا۔ محمد شامی اسی کے ساتھ اس عالمی کپ میں ہیٹ ٹرک لگانے والے پہلے گیند باز بن گئے ہیں۔ یہ ان کے بین الاقوامی کرکٹ کیرئر کی بھی پہلی ہیٹ ٹرک ہے۔
قبل ازیں، ہندوستان کے لئے کپتان وراٹ کوہلی نے سب سے زیادہ 67 رنوں کا تعاون کیا۔ اس کے علاوہ، کیدار جادھو نے 52، لوکیش راہل نے 30، وجے شنکر نے 29 اور دھونی نے 28 رنوں کا تعاون کیا۔ افغانستان کے گلبدین نائب اور محمد نبی نے دو دو وکٹ حاصل کئے۔ جبکہ مجیب الرحمان، آفتاب عالم، راشد خان اور رحمت شاہ کو ایک ایک وکٹ ملا۔
جسپریت بمراہ کو شاندار گیندبازی کے لئے مین آف دی میچ قرار دیا گیا۔