منگلورو 4/ستمبر(ایس او نیوز) حالیہ دنوں میں الال کے قریب نیتراوتی ندی پر بنے ہوئے پُل سے کود کر خودکشی کرنے کے واقعات میں اضافہ ہوتا جارہا ہے۔ اس مقام سے خودکشی کے بڑھتے ہوئے رجحان سے ایسا لگتا ہے کہ یہ پُل ایک خودکشی کا مرکز (سوسائیڈ پوائنٹ) بنتا جارہا ہے۔

یاد رہے کہ ’کافی ڈے‘ کے مالک مشہور و معروف تاجر سدھارتھا ہیگڈے نے 29جولائی کو اس پل سے ندی میں چھلانگ لگاکر خودکشی کی تھی۔ اس کے بعد ایک مہینے کے اندر چار افراد نے خود کشی کرنے کے لئے اسی پل سے ندی میں کودنے کو ترجیح دی ہے۔جس میں سے ایک کو بچالیا گیا تھا۔

اس مسئلے کا حل نکالنے کے لئے رکن اسمبلی ویداویاس کامت نے ضلع ڈپٹی کمشنر کوسسی کانت سینتھل کو تجویز پیش کی ہے کہ اس پل پر سی سی کیمروں کے علاوہ ایک فائبر کی دیوار بھی لگا ئے جائے تاکہ لوگ یہاں سے ندی میں چھلانگ لگانے سے باز رہ سکیں۔

ایم ایل اے ویداویاس کامت نے کہا ہے کہ ”میں نے متعلقہ افسران سے بات کی ہے۔مجوزہ فائبر وال 6فٹ اونچی اور شفاف ہوگی۔جس سے ندی کا نظارہ کرنے اور لطف اٹھا نے میں کوئی رکاوٹ پیدانہیں ہوگی۔ اگلے چند مہینوں کے اندر یہ کام مکمل کیا جائے گا۔