منگلورو:09؍اکتوبر(ایس اؤ نیوز)ایک سال قبل افتتاح کئے گئے ریاست کیرلا کے کنُّور بین الاقوامی ہوائے اڈے (KIA) کی بہتر کارکردگی نے زیادہ تعداد میں مسافروں کو راغب کئے جانے کی وجہ سے منگلورو بین الاقوامی ہوائی اڈہ بری طرح متاثر ہواہے۔
کنور ہوائی اڈہ شروع ہونے سے پہلے مڈکیری اور کیرلا کے مسافر منگلورو ہوائی اڈے سے ہی اپنا رخت سفر باندھتے تھے۔ مگر اب مڈکیری ، کیرلا اور منگلورو کے مسافر بھی کنور کی طرف رخ کرتےہیں۔ منگلورو ہوائی اڈہ بری طرح متاثر ہونے کا ایک اہم سبب یہ بتایا جارہاہے کہ کنور ہوائی اڈے سے خلیجی ممالک کو اڑان بھرنے والی اکثر ہوائی جہازوں کے نرخ منگلوروہوائی اڈے سے بھی سستی ہوتی ہیں، بعض دفعہ اس میں 10،000روپیوں کافرق ہوتاہے۔منگلورو ہوائی اڈے کے مقابلے کنور ہوائی اڈے سے روزانہ اڑان بھرنےو الے ہوائی جہازوں کے اوقات مسافروں کے لئے بہت ہی سہولت فراہم کرنا ایک دوسرا سبب ہے۔
اس سلسلےمیں بات کرتے ہوئے کویت کیرلا مسلم اسوسی ایشن (کرناٹکا شاخ) کے ممبر دیرل کٹے کے مابیا کڈبا نے بتایا کہ اس سے قبل کویت جانےکے لئے منگلورو ہوائی اڈے سےبہت آسانی ہوتی تھی جو اب نہیں ہے۔ انہوں نے بتایا کہ عوام منگلورو سے کویت جانے کے لئے جمعرات کے سفر کو ترجیح دیتے ہیں کیونکہ گلف ممالک میں جمعہ کو تعطیل رہتی ہے۔ ملازمین کو اپنی ڈیوٹی پر حاضری دینے سے پہلے جمعہ کی صبح پہنچ کر آرام کے لئے کافی وقت ملتا تھا ، منگلورو ہوائی اڈے سے جمعرات کو ہوائی جہاز اڑان بھرتی تھی اسی لئے عوام اس طرف کا رخ کیا کرتے تھے، مگر اب کنور سے اڑان بھرنے والی ہوائی جہازوں کا وقت بہت سہولت دیتاہے اور وہاں کے ٹکٹ کا کرایہ بھی منگلورو سے کم ہوتاہے۔ مابیا نے بتایا کہ اوقات کی تبدیلی کے لئے دو مرتبہ دکشن کنڑا ایم پی کو میمورنڈم دیاگیا لیکن کوئی کارروائی نہیں ہوئی۔ جب آپ مسافروں کا خیال نہیں رکھتے تو فطری بات ہے کہ مسافر سہولیات سے آراستہ راستوں کو اپناتے ہیں۔ انہوں نے ہوائی جہاز کے کرایوں کا موازنہ کرتے ہوئے بتایا کہ جب آپ منگلورو سے کویت کے لئے جاناچاہیں تو 120دینار ادا کرنے ہونگے جب کہ اسی سفر کے لئے کنور سے آپ کو 60دینار کا کرایہ ہوگا۔