آندھرا پردیش میں شدید بارش اور سیلاب سے 46 افراد ہلاک
وجئے واڑہ، 11/ستمبر (ایس او نیوز /ایجنسی) آندھرا پردیش میں مسلسل بارش اور سیلاب کے نتیجے میں اب تک 46 افراد جان کی بازی ہار چکے ہیں، اور تقریباً ایک لاکھ 96 ہزار ہیکٹر اراضی کی فصلیں مکمل طور پر تباہ ہو چکی ہیں۔ اس قدرتی آفت نے باغات کو بھی شدید متاثر کیا ہے، جس سے زرعی پیداوار پر منفی اثرات مرتب ہوئے ہیں۔
منگل کو سرکار کی طرف سے جاری کردہ بیان میں بتایا گیا کہ آندھرا پردیش میں موسلادھار بارش اور سیلاب کی وجہ سے اب تک۴۶؍ افراد ہلاک ہو چکے ہیں۔ این ٹی آر ضلع میں ۳۶، گنٹور ضلع میں ۷، ایلورو ضلع میں ۲؍ اور پالاناڈو ضلع میں ایک شخص کی موت ہوئی ہے۔
دریں اثناء ایک لاکھ۹۶؍ ہزار سو ہیکٹر میں فصلوں کو نقصان پہنچا ہے جس سے۲؍ لاکھ ۴۰؍ ہزا ر ۲۷۲؍ کسان متاثر ہوئے ہیں۔ اس کے علاوہ ۱۹؍ ہزار ۶۸۶؍ ہیکٹر پر مشتمل باغات کو بھی نقصان پہنچا ہے جس سے۳۰؍ ہزار ۸۷۷؍ باغبان متاثر ہوئے ہیں۔
اسی دوران بارش اور سیلاب کے سبب ۴۲۰۲ء۶۸؍کلومیٹر طویل سڑکوں کو نقصان پہنچا جبکہ۷۰؍ سڑکوں میں دراڑیں پڑ گئیں۔ اسی دوران وجے واڑہ میں مسلسل بارش کی وجہ سے ۳۳۹؍ ٹرینیں منسوخ کردی گئیں، ۱۸۱؍ کا رخ موڑ دیا گیا اور ۱۲؍ کو جزوی طور پر منسوخ کر دیا گیا۔ خراب موسم کی وجہ سے ریاست میں ۶؍ لاکھ ۴۴؍ ہزار ۱۳۳؍افراد متاثر ہوئے ہیں۔ ان کیلئے ۲۴۶؍ ریلیف کیمپ بنائے گئے ہیں۔ یاد رہےکہ آندھرا پردیش میں گزشتہ۱۰؍ دن سے موسلادھار بارش ہورہی ہے ۔
