بھٹکل 11/ اپریل (ایس او نیوز) عنایت اللہ شاہبندری ابھیمانی سنگھا ، کنداپور رورل آیورویدک کالج اینڈ ہاسپٹل امرتیشوری ایجوکیشن ٹرسٹ کی طرف سے بھٹکل کے عاقب وِلا شادی ہال میں آیورویدک میڈیکل جانچ کیمپ کا انعقاد کیا گیا جس کا افتتاح بھٹکل اسسٹنٹ کمشنر ممتا دیوی نے کیا۔

 افتتاحی تقریب سے خطاب کرتے ہوئے اسسٹنٹ کمشنر نے کہا کہ آج کے ماڈرن زمانے میں بھی آیورویدک علاج کی بہت زیادہ مانگ ہے۔ بہت سے لوگ اس بات سے ناواقف ہیں کہ امراض خواتین، جوڑوں کی بیماریوں، کمر درد ، فالج اور لقوہ، ذیابیطس، بلڈ پریشر جیسی بیماریوں میں آیورویدک علاج بہت ہی کارگر ہوتا ہے۔ اس لئے اس طرح کے کیمپ منعقد کرنا مفید ثابت ہوگا۔ عوام کو اس سے زیادہ سے زیادہ فائدہ اٹھانا چاہیے۔

 عنایت اللہ شاہبندری نے کہا کہ یہ کیمپ صحت عامہ کے تعلق سے خدمات انجام دینے کی طرف ہمارا پہلا قدم ہے۔ اس کے بعد آئندہ ہم نوجوانوں کے مفادات کے پیش نظر سرکاری روزگار سے متعلق کیمپ منعقد کریں گے۔ اس کے علاوہ سرکاری ملازمت حاصل کرنے کے لئے امتحانات دینے کی تیاری کے سلسلے میں رہنمائی کے لئے بھی کیمپ رکھنے کا منصوبہ بنایا جارہا ہے۔

اس موقع پر تحصیلدار روی چندرا ، کنداپور رورل آیورویدک کالج اینڈ ہاسپٹل کے اعزازی صدرڈاکٹر شریدھر راو، ڈاکٹر ایس جی پرسنّا آئتال، ڈاکٹر سویتا پی جی، ڈاکٹر ارچنا کے، ڈاکٹر سندھو مول، ڈاکٹر راجیش چندرا، انجمن حامئی مسلمین کے جنرل سیکریٹری اسماعیل صدیق،ٹی ایم سی صدر پرویز قاسمجی، اربن بینک کے نائب صدر ایم آر نائک اور ٹی ایم سی سابق صدر صادق مٹا وغیرہ موجود تھے۔