بھٹکل،21جنوری (ایس او نیوز) بھٹکل میں تعمیر شدہ منی ودھان سودھا عمارت کا افتتاح 25جنوری کو ریوینیو وزیر اشوک کے ہاتھوں ہوگا۔ اس سلسلے میں رکن اسمبلی سنیل نائک نے بھٹکل اسسٹنٹ کمشنر بھرت اور تحصیلدار روی چندرا سے گفتگو کی اور رسم افتتاح کی تفصیلات طے کی گئیں۔
خیال رہے کہ وزیر اعلیٰ سدارامیا کے سابقہ دور اقتدار میں اُس وقت کے رکن اسمبلی منکال وئیدیا کی کوششوں سے اس منصوبہ کو منظوری ملی تھی۔ کورونا لاک ڈاون اور دیگر مسائل کی وجہ سے تعمیری کام میں رکاوٹیں پیدا ہوگئی تھیں۔ اس منصوبے پر 13.15کروڑ روپے کا خرچ آیا ہے۔
عمارت کی تعمیرتو مکمل ہوگئی ہے لیکن ابھی کچھ ضروری آلات اور ساز وسامان فراہم کیا جانا باقی ہے۔ مگر عوام میں اس کے افتتاح کے تعلق سے اٹھتے ہوئے سوالات کے پیش نظر اس ہفتے میں اس کی رسم افتتاح انجام دینے کا فیصلہ کیا گیا ہے۔
رکن اسمبلی سنیل نائک نے بتایا کہ بھٹکل میں تمیری منصوبے کی تکمیل کو میں ترجیح دے رہا ہوں۔ اس ضمن میں کسی بھی قسم کی سیاست کے لئے گنجائش نہیں ہونی چاہیے۔ جو ساز و سامان فراہم ہونا باقی ہے اسے حاصل کرنےکے لئے میں پوری کوشش کر رہا ہوں۔
کیا فروری میں ہوگا بس اسٹانڈ کا افتتاح؟: اس دوران بعض ذرائع سے یہ خبر بھی ہے کہ جدید سہولتوں سے آراستہ جو بس اسٹانڈ تعمیر ہوچکا ہے اور افتتاح کی راہ دیکھ رہا ہے، اس تعلق سے پروگرام طے کیا جارہا ہے۔ وزیر برائے نقل و حمل لکشمن ساودی کو رسم افتتاح انجام دینے کے لئے مدعو کیا گیا اور حالات سازگار رہے تو فروری کے پہلے ہفتے میں بس اسٹانڈ کا افتتاح ہونا تقریباً یقینی ہے۔