نئی دہلی،6؍اگست (ایس او نیوز؍ایجنسی) دہلی کی شراب سے متعلق پالیسی (ایکسائز پالیسی) کو لے کر عام آدمی پارٹی اور مرکز کے درمیان رسہ کشی کا کھیل جاری ہے۔ دریں اثنا، نائب وزیر اعلیٰ منیش سسودیا نے نئی ایکسائز پالیسی کے حوالہ سے سابق ایل جی ہدف تنقید بنایا۔ انہوں نے ایک پریس کانفرنس سے کہ کہ کس طرح دہلی کی نئی ایکسائز پالیسی 2021-22 نے صحیح طریقے سے لاگو ہونے سے روک کر کچھ لوگوں کو فائدہ پہنچایا۔

منیش سسودیا نے کہا ’’میں نے اس کی شکایت سی بی آئی سے کی ہے۔ مئی 2021 میں منظور ہونے والی نئی ایکسائز پالیسی میں یہ فیصلہ کیا گیا تھا کہ ہر علاقے میں شراب کی یکساں دکانیں ہوں گی۔ پہلے ایک جگہ پر 20 دکانیں تک تھیں، جبکہ کچھ جگہوں پر ایک بھی نہیں تھی۔‘‘

منیش سسودیا نے کہا کہ نئی ایکسائز پالیسی اس وقت کے ایل جی صاحب کے پاس گئی، انہوں نے بہت غور سے پڑھا، اس پالیسی میں صاف لکھا تھا کہ 849 سے زیادہ دکانیں نہیں ہو سکتیں۔ دہلی کے ہر علاقے میں دکانیں یکساں ہوں گی۔ غیر مجاز کالونیوں میں بھی دکانیں ہوں گی۔ ایل جی صاحب نے اسے مکمل پڑھنے کے بعد منظور کر لیا۔ ایل جی صاحب نے پالیسی کی منظوری دی، کوئی اعتراض نہیں ہوا۔

انہوں نے کہا کہ اس کے بعد جب دکانیں کھولنے کی فائل ایل جی صاحب کے پاس آفس پہنچی تو انہوں نے اپنا موقف بدل لیا۔ نومبر کے پہلے ہفتے میں دکانیں کھولنے کی تجویز ایل جی صاحب تک پہنچ گئی۔ نومبر میں انہوں نے ایک نئی شرط رکھی کہ غیر مجاز کالونی میں دکان کھولنے کے لیے ڈی ڈی اے، ایم سی ڈی کی منظوری لینی ہوگی۔

منیش سسودیا نے مزید کہا کہ پہلے ایسا کوئی اصول نہیں تھا اور صرف ایل جی ہاؤس سے منظوری کی ضرورت ہوتی تھی۔ جس کی وجہ سے لائسنس لینے والوں کو کافی پریشانی کا سامنا کرنا پڑا۔ ایل جی صاحب کے فیصلہ بدلنے سے بہتوں کو تکلیف ہوئی۔ اس کے بعد لائسنس ہولڈرز اپنی دکان نہ کھلنے کی وجہ سے عدالت پہنچے جبکہ کئی دکانیں نہ کھلنے کی وجہ سے کچھ دکانداروں کو کافی فائدہ ہوا۔

سسودیا نے کہا ’’ایل جی کا موقف تبدیل کرنے سے حکومت کو ہزاروں کروڑ روپے کا نقصان ہوا۔ فیصلہ 48 گھنٹے پہلے تبدیل کیا گیا تھا۔ میرے خیال میں ایل جی کا موقف تبدیل کرنے کی وجہ سے تقریباً 300 سے 350 دکانیں نہیں کھل سکیں۔‘‘