بنگلورو،30/مئی(ایس او  نیوز) ہبلی دھارواڑ کے رکن پارلیمان پرہلاد جوشی نے ریاست میں متبادل حکومت قائم کرنے کے لئے بی جے پی کی کوششوں کو فضول قرار دیتے ہوئے کہا ہے کہ ریاست کے موجودہ سیاسی بحران کی یکسوئی صرف صدر راج کے نفاذ سے ممکن ہے۔ اخباری نمائندوں سے بات چیت کرتے ہوئے انہوں نے کہاکہ پچھلے ایک سال کے دوران مخلوط حکومت کی نگرانی میں ریاست کا انتظامیہ پوری طرح مفلوج ہوچکا ہے، متبادل حکومت بھی فوری طور پر اس انتظامیہ کو متحرک نہیں کرپائے گی۔ مخلوط حکومت کب گرے گی اس کا اندازہ کسی کو نہیں ہے، بی جے پی کی طرف سے حکومت کو گرانے کے لئے کوئی کوشش کی جائے گی اور نہ فوری طور پر متبادل حکومت قائم کرنے میں جلد بازی سے کام لیا جائے گا بلکہ پارٹی اس وقت انتظار کرے گی جب تک کہ یہ حکومت اپنے آپ ڈھیر نہ ہوجائے، اس کے بعد بی جے پی قیادت کو یہی مشورہ دیا جائے گا کہ ریاست میں صدر راج کا نفاذ ہی مناسب ترین قدم ہے۔