نئی دہلی،18؍جنوری (آئی این ایس انڈیا) مرکز اور ریاستوں نے نئی قومی تعلیمی پالیسی کو نافذ کرنے کے لئے تیاریوں کا آغاز کردیا ہے۔ ڈیڑھ درجن ریاستوں نے نئی پالیسی پر مطالعات اور تجاویز کی تیاری کا کام تقریبا مکمل کر لیا ہے، جبکہ وزارت تعلیم اس پالیسی پر عمل درآمد کو یقینی بنانے کے لئے ایک جائزہ کمیٹی اور ایک عمل درآمد کمیٹی تشکیل دینے جارہی ہے۔ حال ہی میں مرکزی وزیر تعلیم رمیش پوکھریال نشنک نے اپنی وزارت کے اعلی عہدیداروں کے ساتھ نئی تعلیمی پالیسی 2021 کے نفاذ کا جائزہ لیا۔وزارت کے عہدیداروں نے کہاکہ ریاستیں قومی تعلیمی پالیسی کے نفاذ میں بڑی جماعتیں ہیں اور تمام ریاستیں اس سمت میں کام کر رہی ہیں۔ انہوں نے کہا کہ تقریبا ڈیڑھ درجن ریاستوں نے مطالعے کے لئے اس سمت میں ایک ورک فورس ، کمیٹی تشکیل دی ہے اوربتایاکہ تیاری کا کام تقریبا مکمل ہوچکا ہے۔ دریں اثنا مرکزی وزیرتعلیم رمیش پوکھریا نشنک نے تمام فریقوں سے اپیل کی ہے کہ وہ 25 جنوری 2021 تک پالیسی پر عملدرآمد کے حوالے سے تجاویز پیش کریں۔

وزیر مملکت نے قومی تعلیمی پالیسی (نیپ) پر جلد عمل درآمد کو یقینی بنانے کے لئے سکریٹری ہائر ایجوکیشن کی سربراہی میں ایک جائزہ کمیٹی اور ایک عمل درآمد کمیٹی تشکیل دینے کا مشورہ دیا ہے۔ ریاستوں کی جانب سے نئی قومی تعلیمی پالیسی کو نافذ کرنے کے لئے تیز رفتار اقدامات اٹھائے جارہے ہیں۔ اترپردیش میں نائب وزیر اعلی ڈاکٹر دنیش شرما کی سربراہی میں ریاست کے تعلیمی اداروں میں نیشنل ایجوکیشن پالیسی 2020 کو نافذ کرنے کے لئے متعدد ٹاسک فورس اجلاس ہوئے ہیں۔ اس میں محکمہ بنیادی تعلیم، ثانوی تعلیم، تکنیکی تعلیم، پیشہ ورانہ تعلیم اور اعلی تعلیم کے شعبہ کی جانب سے قومی تعلیمی پالیسی 2020 کو عملی جامہ پہنانے کی سمت کاروائی کی 150 صفحات کی مرتب کردہ رپورٹ بھی پیش کی گئی۔