روشن بیگ کے گھر پرسی بی آئی کا چھاپہ، سابق وزیر کی عرضی ضمانت پر سماعت 25نومبر تک ملتوی
بنگلورو،24؍نومبر (ایس او نیوز)آئی ایم اے کیس کے سلسلہ میں اتوار کے روز سی بی آئی کی طرف سے گرفتار سابق وزیر روشن بیگ کی رہائش گاہ پر پیر کی صبح سی بی آئی افسروں نے چھاپہ مارا اور وہاں کافی دیر تک تلاشی لینے کے بعد لوٹ گئی۔ اس دوران شہر کی36ویں سٹی سیشن عدالت میں روشن بیگ کی عرضی ضمانت دائر کی گئی جس کو سماعت کے لئے داخل کرتے ہوئے جج نے اس پر اعتراضات داخل کرنے کے لئے سی بی آئی کو نوٹس جاری کیا اور عرضی کی سماعت 25نومبر تک ملتوی کردی۔ پیر کی صبح 7.45بجے 13سی بی آئی افسروں کی ایک ٹیم نے شہر کے بھارتی نگر میں واقع روشن بیگ کی رہائش گاہ پر دھاوا بول دیا اور وہاں پر کافی دیر تک تلاشی مہم جاری رکھی۔ بتایا جاتا ہے کہ سی بی آئی نے روشن بیگ کے اہل خانہ کی موجود گی میں ان کے مکان کی تلاشی مہم چلائی۔ اس مہم کے دوران سی بی آئی نے روشن بیگ کی املاک اور ان کے بینک کھاتوں کے متعلق دستاویزات وغیرہ ضبط کئے ہیں۔ اس دوران بتایا جاتا ہے کہ سی بی آئی نے اس کیس کے کلیدی ملزم آئی ایم اے کے سربراہ منصور خان کو دوبارہ حراست میں لے لیا ہے۔انہیں پیر کے روز عدالت میں پیش کیا گیا جہاں جج نے انہیں 5دن تک کی سی بی آئی تحویل میں دیدیا۔ یہ خبر بھی سامنے آئی ہے کہ سی بی آئی افسروں نے روشن بیگ کے فرزند رومان بیگ کے دفتر کا بھی معائنہ کیا جو شہر کے جئے محل میں واقع ہے۔