آئی ایم اے فراڈ کیس کے 4ملزمین کو ضمانت،حنیف افسر عزیزی کی عرضی ضمانت مسترد منصور خا ن کو تحویل میں لینے ایس آئی ٹی کی کوشش کو دھکا،پھر ای ڈی کی حراست میں
بنگلورو،27؍جولائی (ایس او نیوز) کروڑوں روپیوں کے آئی ایم ا ے فراڈ کیس کے سلسلے میں گرفتاردو سینئر سرکاری افسروں سمیت چار ملزمین کو آج ضمانت پر رہا کردیا گیا۔ بنگلور اربن ضلع کے ڈپٹی کمشنر وجئے کمار، اسسٹنٹ کمشنر بنگلورو نارتھ ایل سی ناگراج،بی ڈی اے کمار اور ولیج اکاؤنٹنٹ منجوناتھ کی ضمانت منظور کر لی گئی۔ جبکہ مولانا حنیف افسر عزیزی کی عرضی ضمانت نامنظور کردی گئی۔آج اس کیس میں پی ایم ایل اے خصوصی عدالت میں چار ملزمین کی عرضی ضمانت کو منظور کر لیا گیا اور دیر شام ان چاروں ملزمین کو پرپنا اگراہارا جیل سے رہائی بھی مل گئی۔ دوسری جانب حنیف افسر عزیزی کی طرف سے دائر کی گئی ضمانت کی عرضی کو عدالت نے مسترد کرتے ہوئے ان کی عدالتی حراست کی مدت بڑھا دی۔ بنگلورو ضلع کے ڈپٹی کمشنر وجئے شنکر پر آئی ایم اے کے حق میں رپورٹ تیار کرنے کے عوض ڈیڑھ کروڑ روپے کی رشوت لینے کا الزام ہے۔ ان کے علاوہ آئی ایم اے سے 4.5کروڑ کی رشوت خوری کے الزام میں گرفتار ایل سی ناگراج کو بھی آج ضمانت مل گئی۔ آئی ایم اے کے سربراہ منصور خان سے 4کروڑ روپے لینے کے الزام میں گرفتار بی ڈی اے کمار اور ایل سی ناگراج کے ساتھ رشوت خوری میں شامل ولیج اکاؤنٹنٹ منجوناتھ کو بھی آج رہا کردیا گیا۔ آئی ایم اے فراڈ کیس میں کلیدی ملزم منصور خان کو اپنی تحویل میں لینے ایس آئی ٹی کی کوششوں کو آج اس وقت دھکا لگا جب عدالت نے ایک بار پھر منصور خان کو انفورسمنٹ ڈائرکٹوریٹ(ای ڈی) کے سپرد کردیا۔ دوران سماعت انفورسمنٹ ڈائرکٹوریٹ کے افسروں نے عدالت کو بتایا کہ گزشتہ 6دن کے دوران منصور خان کی صحت مسلسل خراب رہنے کے سبب ان سے پوچھ گچھ مکمل نہ ہو سکی، اسی لئے مزید کچھ دنوں کے لئے انہیں ای ڈی کی تحویل میں دیا جائے۔ عدالت نے اس استدلال کو منظور کرتے ہوئے منصور خان کو یکم اگست تک ای ڈی کی تحویل میں دئیے جانے کا حکم دیا۔منصور خان کی دوبئی سے دہلی آمد کے بعد ان کی گرفتاری سے لے کر اب تک ا نہیں ای ڈی نے ہی اپنی تحویل میں رکھا ہے۔