غیر قانونی طور پر اسمگل کیا جانے والا راشن کا چاول ضبط
ہلیال26؍مارچ ( ایس او نیوز) بی پی ایل راشن کارڈ رکھنے والوں کو انّا بھاگیہ اسکیم کے تحت مفت فراہم کیے جانے والاچاول غیر قانونی طور پر کسی اور جگہ لے جایاجارہاتھا جسے پولیس نے ضبط کرلیا ہے۔
پولیس کے بیان کے مطابق راشن کا چاول غیرقانونی طور پر اسمگل کیے جانے کی مصدقہ اطلاع ملنے پر اس نے کارروائی کی اوررات کے وقت ڈانڈیلی کے راستے سے ہلیال شہر میں داخل ہونے والے ایک بولیرو پِک اَپ ٹرک کو روکا تو اس کے اندرانّا بھاگیہ اسکیم والے چاول کے 48تھیلے موجود تھے۔جن کا مجموعی وزن 2834کیلو گرام تھا۔اپنی گاڑی میں سرکاری اسکیم کا چاول لے جانے کے لئے ہلیال کے رہنے والے ڈرائیوریاسین عبدالشکور کے پاس کوئی اجازت نامہ یا قانونی دستاویز موجود نہیں تھے۔اس لئے ہلیال پولیس نے چاول اور گاڑی ضبط کرتے ہوئے کیس داخل کرلیا ہے۔چونکہ یہ چاول سرکاری مہر والے تھیلوں سے نکال کر دوسرے تھیلوں میں بھرا گیا تھا اس لئے پولیس افسران کے لئے اسے انّا بھاگیہ اسکیم کا ہی چاول قرار دینا مشکل ہوگیا ہے۔ اس لئے صرف بغیر اجازت کے پک اپ میں بڑی مقدار میں چاول لے جانے کا معاملہ ہی درج کیا گیا ہے۔
عام طور پر یہ شکایت سنائی دیتی ہے کہ سرکار کی طرف سے غریب عوام کو مفت فراہم کرنے کے لئے جوچاول راشن کی دکانوں پر بھیجا جاتا ہے ، اس کا غلط استعمال ہوتا ہے اور مستحق غریبوں کو پوری طرح اس کا فائد پہنچائے بغیر راشن کی دکان والوں اور بازارکے دیگر کاروباریوں کی ملی بھگت سے اس کا بڑا حصہ غیر قانونی طور پر بازار میں فروخت کیا جاتا ہے۔