وزیراعلی کے چہرے کا اعلان نہیں کیا تو بی جے پی کوہوسکتاہے فائدہ، ذمہ داری ملی تو ایمانداری سے اداکروں گا: ہریش راوت
نئی دہلی، 17 جنوری (آئی این ایس انڈیا) اتراکھنڈ کے سابق وزیر اعلی اور کانگریس کے سینئر لیڈر ہریش راوت نے اتوار کے روز پارٹی کو ریاست میں وزیراعلی کے عہدے کا چہرہ قرار دینے کی ضرورت کا اعادہ کرتے ہوئے کہا ہے کہ اگر پارٹی انھیں یہ ذمہ داری دیتی ہے تو وہ اسے مکمل طور پر اداکریں گے، لیکن اگر وہ کسی اور کا انتخاب کرتے ہیں تو وہ اس کی مکمل حمایت کریں گے۔
انہوں نے یہ بھی کہا کہ اگر وزیر اعلی کے عہدے کے لئے امیدوار کا اعلان نہیں کیا جاتا ہے تو بی جے پی اپنی تنظیم اور پیسے کی طاقت کی وجہ سے آئندہ اسمبلی انتخابات میں کانگریس کو مات دے سکتی ہے۔ حال ہی میں 72 سالہ راوت نے عوامی طور پر تبصرہ کیا تھا کہ پارٹی کو وزیر اعلی کے عہدے کا چہرہ اعلان کرنا چاہئے۔ اس کے بعد وہ ریاستی کانگریس کمیٹی کے کچھ لیڈران کے نشانے پر آگئے تھے۔ اسے کانگریس میں گروپ بندی کے طور پر بھی دیکھا جارہا ہے۔ اتراکھنڈ میں اگلے سال کے شروع میں اسمبلی انتخابات ہونے والے ہیں۔
کانگریس کے جنرل سکریٹری راوت نے انٹرویو دیتے ہوئے کہاکہ پارٹی کے سامنے انتخابات میں کوئی الجھن نہیں ہونی چاہئے اور عوام کو یہ واضح ہونا چاہئے کہ چہرہ کون ہے۔ کانگریس کے لئے یہ ضروری ہے کیونکہ بی جے پی ہر انتخابات کو ’مودی بمقابلہ کانگریس کا مقامی لیڈر‘بناتی ہے۔ انتخابات کو مقامی معاملات تک پہنچانے کے لئے ایک چہرے کی ضرورت ہے۔انہوں نے کہاکہ جب امریندر سنگھ کو پنجاب میں وزیر اعلی کا امیدوار قرار دیا گیا تو ہمیں فائدہ ہوا۔ ہریانہ میں بھوپندر سنگھ ہڈا کے نام کو سامنے رکھا گیا تو ہارے ہوئے الیکشن میں ہم برابر کی لڑائی میں آگئے، ہم شیلا دکشت کو آگے رکھا تو دہلی میں لوک سبھا انتخابات میں ہم دوسرے نمبر پر رہے،اس لئے میں یہ کہنا چاہتا ہوں کہ چہرے کی وجہ سے کوئی الجھنیں پیدا نہیں ہوگی، جس سے ہمیں فائدہ ہوگا۔
