ڈرہم،29؍جون (ایس او نیوز؍ایجنسی)آئی سی سی کرکٹ ورلڈ کپ 2019ء کے 34 ویں میچ میں جنوبی افریقا نے سری لنکا کو باآسانی 9 وکٹوں سے شکست دے ڈالی۔

تفصیلات کے مطابق چیسٹر لی اسٹریٹ میں کھیلے گئے میچ میں سری لنکا نے میچ جیتنے کیلئے 204 رنز کا ہدف دیا، جو جنوبی افریقہ نے 38 ویں اوور میں صرف ایک وکٹ گنوا کر حاصل کر لیا۔ جنوبی افریقا کی واحد وکٹ 31 رنز پر گری، ڈی کوک 15 رنز بنا کر ملنگا کی گیند پر کلین بولڈ ہوئے۔ اس کے بعد کپتان ڈوپلیسی اور ہاشم آملہ نے دوسری وکٹ کی شراکت میں 175 رنز بنا کر ٹیم کو فتح سے ہمکنار کر دیا۔ ڈوپلیسی 96 اور ہاشم آملہ 80 رنز کے ساتھ ناقابل شکست رہے۔

ڈرہم کے چیسٹر لی اسٹریٹ گراؤنڈ پر کھیلے گئے میچ میں جنوبی افریقا کے کپتان فاف ڈوپلیسی نے ٹاس جیت کر فیلڈنگ کا فیصلہ کیا۔

سری لنکن کی اننگز کا آغاز مایوس کن رہا اور اوپنر دیموتھ کرونا رتنے پہلی ہی گیند پر رباڈا کی گیند پر ڈوپلیسی کے ہاتھوں کیچ آؤٹ ہوگئے۔

پریرا اور فرنانڈو نے 67 رنز بنا کر ٹیم کو مشکل سے نکالا، اس موقع پر فرنانڈو 30 رنز کی اننگز کھیل کر پویلین لوٹ گئے۔ اسکور میں صرف 5 رنز کا ہی اضافہ ہوا تھا کہ کشال پریرا کو 30 رنز پر پریٹوریس نے کلین بولڈ کر دیا۔

نئے آنے والے بیٹسمین اینجلو میتھیوز زیادہ دیر وکٹ پر نہ ٹھہر سکے اور 11 رنز بنا کر موریس کی گیند پر کلین بولڈ ہوگئے۔ کشال مینڈس 23 اور دھننجایا ڈی سلوا 24 رنز بنا سکے۔ اس طرح سری لنکا کی ٹیم آخری اوور کی تیسری گیند پر 203 رنز بنا کر آؤٹ ہوگئی۔

جنوبی افریقہ  کی جانب سے موریس اور پریٹوریس نے تین، تین، رباڈا نے دو جبکہ فیلوکوایو اور ڈومینی نے ایک، ایک وکٹ حاصل کی۔

شاندار بولنگ کا مظاہرہ کرنے پر پریٹوریس مین آف دی میچ کے حقدار قرار پائے۔

یاد رہے کہ اس کے ساتھ ہی سری لنکا سیمی فائنل کی دوڑ سے باہر ہو گیا ہے۔