میلبرن،6؍نومبر (ایس او نیوز؍ایجنسی) آئی سی سی ٹی 20 ورلڈ کپ کے سپر 12 مرحلے کے میچ میں ہندوستان نے زمبابوے کو 71 رنز کے بڑے مارجن سے شکست دے دی۔ آئی سی سی ٹی 20 ورلڈ کپ کے سپر 12 مرحلے کے میچ میں ہندوستان نے پہلے بیٹنگ کرتے ہوئے زمبابوے کو جیت کے لیے 187 رنز کا ہدف دیا تھا جس کے تعاقب میں زمبابوے کی پوری ٹیم 18 ویں اوور میں 115 رنز بنا کر آؤٹ ہوگئی۔

زمبابوے کی جانب سے ریان برل 35 اور آل راؤنڈر سکندر رضا 34 رنز بنا کر نمایاں رہے. ان دونوں بلے بازروں کی علاوہ کوئی بھی کھلاڑی ہندوستانی باؤلرز کے سامنے ٹک نہیں سکا، زمبابوے کے 6 کھلاڑی دہرے ہندسے میں بھی داخل نہ ہوسکے اور پوری ٹیم صرف 115 رنز ہی بناسکی۔

ہندوستان کی جانب سے اسپنر روی چندرن ایوشن نے 3 کھلاڑیوں کو آؤٹ کیا جب کہ محمد شامی اور ہارڈک پانڈیا نے 2، 2 وکٹیں حاصل کیں، ان کے علاوہ ارشدیپ سنگھ، پھویشنو کمار اور اکسر پٹیل نے ایک، ایک بلے باز کو آؤٹ کیا۔ قبل ازیں، میلبرن کرکٹ گراؤنڈ میں کھیلے جانے والے میچ میں ہندوستان نے زمبابوے کے خلاف ٹاس جیت کر بیٹنگ کا فیصلہ کیا تھا۔

ہندوستانی ٹیم نے پہلے بیٹنگ کرتے ہوئے مقررہ بیس اوورز میں 5 وکٹوں کے نقصان پر 186 رنز بنائے۔ ہندوستان کی جانب سے مڈل آرڈر بلے باز سریاکمار یادیو نے 25 گیندوں پر 61 رنز کی جارحانہ اننگز کھیلی۔ اس کے علاوہ اوپنر کے ایل راہول 51، ویرات کوہلی 26، ہارڈک پانڈیا 18رنز بناکر نمایاں رہے جب کہ کپتان روہت شرما 15 اور رشپ پانٹ نے 3 رنز بنائے۔

اس طرح ہندوستان نے بیس اوورز میں 5وکٹوں کی جانب سے 186 رنز بنائے اور زمبابوے کو جیت کے لیے 187 رنز کا ہدف دیا۔ زمبابوے کی جانب سے سین ولیمز نے 2 ہندوستانی بلے بازوں کو پویلین کی راہ دکھائی جب کہ رچرڈ نگاراوا، بلیسنگ مضارابانی اور سکندر رضا نے ایک ایک وکٹ حاصل کی۔

ہندوستان کی جانب سے 25 گیندوں پر 61 رنز کی شاندار اور جارحانہ اننگز کھیلنے پر مڈل آرڈر بلے باز سریا کمار یادیو کو پلیئر آف دی میچ قرار دیا گیا۔ واضح رہے کہ گروپ 2 سے ہندوستان سیمی فائنل کے لیے پہلے ہی کوالیفائی کرچکا تھا۔

ہندوستان کی فتح کے ساتھ ہی یہ بات بھی واضح ہوگئی ہے کہ سیمی فائنل میں کونسی ٹیم کس ٹیم کے مد مقابل ہوگی۔ سیمی فانئل میں پاکستان کا مقابلہ 9 نومبر بروز بدھ جمعرات کو نیوزی لینڈ سے ہوگا جب کہ دوسرے سیمی فائنل میں ہندوستان کی ٹیم 10 نومبر کو انگلینڈ سے ٹکرائے گی۔