دبئی: یواے ای واپس جانے والے نوٹ کریں: دبئی روانگی سے پہلے جی ڈی آر ایف اے سے ریٹرن پرمٹ حاصل کرنا ہوگا لازمی
ابوظہبی اور شارجہ کے مسافروں کو اپنا ڈیٹا آئی سی اے کے ویب سائٹ پر کرنا ہوگا اَپ لوڈ
دبئی،17؍اگست (ایس او نیوز) ہوائی کمپنی ایئر انڈیا کی طرف سے جاری کیے گئے ایک بیان میں وضاحت کی گئی ہے کہ متحدہ عرب امارات (یو اے ای) کی رہائشی ویزا رکھنے والے جو بھی ہندوستانی واپسی کا سفر اختیار کررہے ہیں ا ن میں سے دبئی جانے کی خواہش رکھنے والوں کے لئے سفر سے پہلے جنرل ڈائریکٹوریٹ آف ریسیڈنس اینڈ فارن افیئر(جی ڈی آر ایف اے) کی جانب سے توثیق شدہ ریٹرن پرمٹ حاصل کرنا لازمی ہوگا۔
جبکہ شارجہ اور ابوظہبی کا سفر کرنے والوں کے لئے ریٹرن پرمٹ حاصل کرنے کی یہ شرط لاگو نہیں ہوگی البتہ ان کے لئے ضروری ہوگا کہ وہ سفر سے پہلے اپنے رہائشی دستاویزات کو فیڈرل اتھاریٹی آف آئنڈنٹی اینڈ سٹی زن شپ (آئی سی اے) کے ویب سائٹ uaeentry.ica.gov.ae پر اَپ لوڈ کریں تاکہ اس کی جانچ اور توثیق کی جاسکے۔
گلف نیوز میں شائع رپورٹ کے مطابق ایئر انڈیا نے کہا ہے کہ اس کی طر ف سے یہ تاز ہ بیان اس لیے جاری کیا گیا ہے تاکہ ایئر لائن کی طرف سے اس سے پہلے جو ٹویٹس کیے گئے تھے، اس سے پیداہونے والی الجھن (کنفیوژن) دور ہوجائے۔
خیال رہے کہ جمعہ کے دن ایئر انڈیا ایکسپریس نے اپنے ٹویٹ میں کہا تھاکہ ’یو اے ای کی رہائشی ویزا رکھنے والے اب آئی سی اے یا جی ڈی آر ایف کی توثیق کے بغیر یواے ای کا سفر اختیار کرسکیں گے۔‘ لیکن اب یہ وضاحت کردی گئی ہے کہ اس طرح کی چھوٹ صرف ابوظہبی اور شارجہ کے لئے ہے، دبئی کے لئے نہیں ہے۔ایئر انڈیا نے اپنے تازہ ٹویٹ میں کہا ہے کہ ”ہم سمجھتے ہیں کہ اس معاملے میں جو تبدیلی ہوئی ہے اس سے بہت سے لوگوں کو الجھن اور مشکلات کا سامنا کرنا پڑا ہے۔ہم آپ کو تازہ جانکاری دیتے رہیں گے۔“