بھٹکل کے ہورلی سال میں اچانک سروے کا کام شروع کرنے پر عوام میں ناراضگی، کام کو روکتے ہوئے کیا احتجاج
بھٹکل 9/جون (ایس او نیوز) یہاں جالی پٹن پنچایت حدود کے ہورلی سال میں سرکاری آتی کرم زمینات کا اچانک سروے کا کام شروع کرنے پر عوام میں سخت ناراضگی پائی جارہی ہے اور وہ تشویش میں مبتلا ہوگئے ہیں کہ کہیں سروے کرکے انہیں آتی کرم زمینات سے بے دخل کرنے کا کام نہ شروع کیا جائے۔اس تعلقق سے علاقہ کے لوگوں نے پیر کو سروے کی سخت مخالفت کرتے ہوئے کام کو روک دیا اور اس بات پر سخت ناراضگی ظاہر کی کہ بغیر کوئی اطلاع دئے تحصیلدار کی جانب سے سروے کا کام بالکل غلط ہے۔
مقامی لوگوں نے بتایا کہ ہمارے پاس رہنے کے لئے ان جگہوں کے علاوہ کوئی دوسری جگہ نہیں ہے، ہم چالیس پچاس سالوں سے یہیں چھوٹے چھوٹے مکانات تعمیر کرکے رہتے آرہے ہیں، مگر اچانک تحصیلدار نے یہاں سروے کرنے کے لئے اہلکاروں کو بھیجا ہے۔ ہم محنت مزدوری کرکے دو وقت کی روٹی بمشکل حاصل کرپاتے ہیں، ایسے میں سروے کا کام شروع کرنے سے ہمیں تشویش ہورہی ہے کہ آخر یہ سروے کس مقصد کے تحت کیا جارہا ہے۔ لوگوں نے سروے کا کام روکتے ہوئے تحصیلدار کو فون کرکے اطلاع دی کہ وہ خود جائے وقوع پر پہنچ کر ہمیں بتائیں کہ وہ یہاں سروے کس مقصد کے تحت کرنا چاہتے ہیں۔ قریب دو گھنٹوں تک سروے کا کام رُکا رہا مگر تحصیلدار جائے وقوع پر نہیں پہنچے۔ البتہ پولس نے بعد میں ان سبھوں کو منتشر کرتے ہوئے سروے کا کام شروع کرایا۔ پولس نے احتجاجیوں کو بتایا کہ انہیں اگر کوئی شکایت ہے تو وہ اے سی دفتر جائیں اور وہاں اپنی شکایت درج کرائیں، مگر یہاں سروے کے کام میں مداخلت نہ کریں۔ پولس کی بھاری تعداد کو دیکھتے ہوئے بالاخر احتجاجی یہ کہہ کر منتشر ہونا بہترسمجھا کہ کہیں پولس ان پر لاٹھی کا استعمال شروع نہ کردیں۔