منگلورو، 9؍ مئی (ایس او نیوز) جنوبی کنڑا ضلع کے منگلورو میں 700 سے زیادہ دیہاڑی مزدوروں نے ریاستی حکومت سے اپنے گھر لوٹنے کے لئے سہولت مہیا کرانے کا مطالبہ کرتے ہوئے جمعہ کو دھرنا دیا۔ اتر پردیش ، بہار، جھارکھنڈ اور دیگر ریاستوں کے مظاہرین مزدور بنیادی طور پر جنوبی کنڑا ضلع سے آئے تھے۔
مظاہرین ریاستی حکومت سے انہیں اپنے گھر بھیجنے کے لئے سہولت مہیا کرانے کا مطالبہ کرر ہے تھے۔ مظاہرین کا کہنا تھا کہ لاک داؤن کی وجہ سے ان کے پاس کوئی کام نہیں ہے اور بغیر کمائی کے انہیں کافی دقتوں کا سامنا کرنا پڑرہا ہے ۔
بتایا جارہا ہے کہ مزدورو ریلوے اسٹیشن پر اس لئے جٹے تھے کیونکہ افواہ پھیلی تھی کہ ریاستی حکومت انہیں ان کی ریاست بھیجنے کے لئے ٹرینوں کا انتظام کررہی ہے۔
واضح رہے کہ حال ہی میں ریاستی حکومت نے کہا تھا کہ اس نے ریلوے کے افسروں سے مزدوروں کو ان کے گھر واپس بھیجنے کے لئے خصوصی ٹرین چلانے کے سلسلے میں رابطہ کیا ہے، لیکن بعد میں حکومت نے مزدوروں سے اپنی ریاست نہ جانے کی اپیل کی تھی۔ حکومت کے اس فیصلے کی سوشیل میڈیا پر تنقید ہونے کے بعد ریاستی حکومت نے ایک بار پھر اپنا رُخ بدلا اور مزدوروں کو ان کی آبائی ریاست بھیجنے کے لئے ٹرینیں اور دیگر سہولیات مہیا کرانے کی یقین دہانی کی۔