دبئی : متحدہ عرب امارات میں انسانوں کواسمگل کرنے کی کوشش ناکام۔ ٹرک کے خفیہ خانے سے برآمد ہوئے 18افراد
دبئی 11/ستمبر(ایس او نیوز) گلف نیوز میں شائع ایک رپورٹ کے مطابق ابوظہبی پولیس اور کسٹمز نے ایک مصدقہ اطلاع پر کارروائی کرتے ہوئے ختم الشکلا سرحد سے غیر قانونی طور پر ٹرک کے اندر 18افراد کو چھپاکر لانے اور متحدہ عرب امارات میں داخل کروانے کی کوشش کوناکام کردیا ہے۔
پولیس ذرائع کے مطابق یو اے ای میں داخل ہونے کی کوشش کررہے ایک ٹرک کو جب بورئیمی ۔العین چیک پوسٹ پر روک کر اس کی تلاشی لی گئی توپتہ چلا کہ اس کے اندر خفیہ خانہ بناکر 18افراد کو ٹھونساگیا ہے۔ان میں خواتین کی بھی اچھی خاصی تعداد موجود تھی۔ بتایا گیا ہے کہ یہ سرحدی چیک پوسٹ عمان اور متحدہ عرب امارات کے درمیان واقع ہے۔
ابو ظہبی پولیس کا کہنا ہے کہ اس طرح غیر قانونی طورپر انسانوں کو اسمگل کرنے کا معاملہ روشنی میں آیاہے۔ پولیس تارک الوطنوں کے اس طرح غیر قانونی طور پرمتحدہ عرب امار ات میں داخلے کو ایک سنگین مسئلہ بتاتے ہوئے کہا کہ اس کی روک تھام کے لئے سخت اقدامات کیے جارہے ہیں، کیونکہ اس طرح کے لوگوں کی وجہ سے سماجی اور معاشرتی جرائم میں اضافہ ہورہا ہے۔