نئی دہلی 12/نومبر (ایس او نیوز): سپریم کورٹ نے ڈیفنس کالونی رہائشی ویلفیئر ایسوسی ایشن (RWA) کو دہلی کی تاریخی لودی دور کے مقبرہ  پر غیر قانونی قبضہ کرنے پر شدید برہمی کا اظہار کرتے ہوئے سخت الفاظ میں RWA سے سوال کیا، "آپ کو دہلی میں لودی دور کی گمٹی پر قبضہ کرنے کی جرأت کیسے ہوئی؟" عدالت نے آثار قدیمہ کے سروے آف انڈیا (ASI) کو بھی اس غیر قانونی قبضے کو روکنے میں ناکامی پر سخت سرزنش کی۔

جسٹس سدھانشو دھولیا اور جسٹس احسان الدین امان اللہ پر مشتمل بینچ نے منگل کو اس کیس کی سماعت کی، جس میں پہلے ہی CBI کو تحقیقات کا حکم دیا گیا تھا کہ کس طرح یہ تاریخی مقام RWA کے قبضے میں آیا۔ جسٹس دھولیا نے RWA کی سرزنش کرتے ہوئے 700 سال قدیم اس مقبرے کی تاریخی اہمیت پر زور دیا اور کہا، ’’آپ یہاں کیسے داخل ہوئے؟‘‘

DCWA کے وکیل نے جب کہا کہ "ہم دہائیوں سے یہاں ہیں۔" تو جسٹس دھولیا مزید برہم ہوگئے اور پوچھا کہ "یہ کیسی دلیل ہے؟" جسٹس امان اللہ نے مزید کہا، "یہ ناقابل قبول ہے، اگر ضرورت پڑی تو ہم آپ کو عدالت میں ہی بے دخل کر دیں گے۔" DCWA کے وکیل نے کہا کہ "یہاں اینٹی سوشیل عناصر آ سکتے ہیں"، جس پر بینچ مزید برہم ہو گیا اور کہا، "آپ نوآبادیاتی حکمرانوں کی طرح بات کر رہے ہیں۔ جیسے 'اگر ہم بھارت نہ آتے تو کیا ہوتا'۔"

عدالت نے محکمہ آثار قدیمہ کو بھی اس بات پر سرزنش کی کہ انہوں نے DCWA کو اس مقبرے پر غیر قانونی قبضہ کرنے کی اجازت دی، جس میں انہوں نے جھوٹے سیلنگ، بجلی کے پنکھے اور فرنیچر نصب کر دیے ہیں۔ 

عدالت نے  ایک ماہر کو مقرر کرنے کا فیصلہ کیا جو اس مقبرے کو پہنچنے والے نقصان کا جائزہ لے گا اور بحالی کے اقدامات تجویز کرے گا۔ عدالت نے ماہر کو حکم دیا کہ وہ 6 ہفتوں میں رپورٹ جمع کروائے، اور کیس کی اگلی سماعت کے لیے تاریخ 21 جنوری 2025 مقرر کر دی۔

عدالت نے سی بی آئی اور درخواست گزار راجیو سوری کی تعریف کرتے ہوئے کہا کہ انہوں نے اس غیر قانونی قبضے کو اجاگر کرنے میں اہم کردار ادا کیا۔