ہوناور ،14؍ اگست (ایس او نیوز) شراوتی پروجیکٹ کے لنگن مکّی ڈیم والے علاقے میں مسلسل بارش کی وجہ سے آبی ذخیرہ میں  بھاری اضافہ ہوا ہے ۔ جس کے پیش نظر اضافی پانی کو کسی بھی وقت ڈیم سے ندی میں چھوڑا جا سکتا ہے ۔ اس لئے کرناٹکا پاور کارپوریشن نے ندی کنارے بسنے والوں کو محفوظ مقامات پر منتقل ہونے کی ہدایت جاری کی ہے ۔ 
    
ڈیم میں آبی ذخیرہ کی زیادہ سے زیادہ مقدار 1819 فٹ ہے اور کل سنیچر کے دن اس کی سطح 1811.80 فٹ ہوگئی تھی ۔ جس کا مطلب یہ ہے کہ 29,000 کیوسیک اضافی پانی جمع ہوا ہے ۔ اگر اسی رفتار سے پانی کی سطح میں اضافہ ہوتا رہا تو پھر جلد ہی ڈیم سطح حد سے زیادہ ہو جائے گی اور ڈیم کی حفاظت کے پیش نظر اضافی پانی کو ندی میں چھوڑنا ناگزیر ہوجائے گا ۔ یہ پانی بہہ کر گیروسوپّا ڈیم میں آ جائے گا جس کے اندر پانی ذخیرہ کرنے کی حد کم ہونے کی وجہ سے لنگن مکّی سے آنے والا پانی یہاں جمع نہیں کیا جا سکے گا اور لامحالہ اسے ندی میں چھوڑنا ہوگا ۔ جس کے نتیجہ میں شراوتی ندی کنارے بسنے والوں کے جان و مال کا خطرہ پیدا ہوگا ۔ اس لئے انہیں محفوظ مقامات پر منتقل ہونے کی ہدایت دی گئی ہے ۔