ہوناور کے اڈگونجی میں جڑواں بہنوں نے کی زہر کھاکر خود کشی
ہوناور:5؍ جنوری (ایس اؤ نیوز) تعلقہ کے ایڈگونجی کے ایک گھر میں جڑواں بہنیں اپنی صحت اور غربت سے بیزار اور ذہنی پریشانی میں مبتلا ہونے سے زہر کھاکر خودکشی کرنےکا واقعہ پیش آیا ہے۔
زہر کھاکر ہلاک ہونے والی جڑواں بہنوں کی شناخت میگھ شری سبرائے نائک (22) اور بھاگیہ شری سبرائے نائک (22) کی حیثیت سے کی گئی ہے۔ دونوں بہنیں پیر کو اپنے گھر کے پیچھے واقع کاجو باغ میں زہر کھاکر تڑپتے ہوئے مقامی لوگوں نے دیکھا تو منکی سرکاری اسپتال میں ابتدائی علاج کے بعد ہوناور کے سرکاری اسپتال میں منتقل کیا۔ پھر وہاں سے زائد علاج کے لئے کاروار سول اسپتال لے گئے لیکن علاج کارگر نہ ہونے سے منگل کو جڑواں بہنوں نے دم توڑدیا۔
ذرائع سے پتہ چلا ہے کہ دونوں جڑواں بہنیں پیدائشی طورپر بے ہوشی کی بیماری میں مبتلا تھیں اور چھوٹی چھوٹی باتوں پر غصہ ہونے کا مزاج بھی رکھتی تھیں جس کی وجہ سے دونوں بہنیں ذہنی طورپر بہت پریشان بھی رہتی تھیں۔ پتہ چلا ہے کہ اس سے قبل بھی دونوں نے دو مرتبہ خودکشی کی کوشش کی تھی اور اسی بات کو لےکر ذہنی اذیت کا شکار تھیں۔ پیر کو جب گھر میں کوئی نہیں تھا تو دونوں نے زہر کھاکر خودکشی کرلی ۔
بھائی بھی ذہنی اپاہج: مقامی طورپر معاملے کے متعلق جانکاری حاصل کرنےکی کوشش کی گئی تو پتہ چلا کہ ان کا بھائی بھی ذہنی اپاہج ہے۔ وہ بھی بے ہوشی کی بیماری میں مبتلا ہے اور جسمانی طورپر بھی اپاہج ہے۔ معلوم ہوا ہے کہ اُس کی دیکھ ریکھ یہی دونوں بہنیں کررہی تھیں۔ سمجھا جارہا ہے کہ تمام حالات کو دیکھنے کے بعد غالباً بہنوں نے خودکشی کرکے ہی اس دنیا کو وداع کرنے کا منصوبہ بنایا ہوگا۔