ہوناور :21؍مئی  (ایس اؤ نیوز) کاسرکوڈ ٹونکا کے تجارتی بندرگاہ کے علاقے میں جمعہ کی صبح مقامی جہدکاروں اور کانٹراکٹ کمپنی والوں کے درمیان  زبانی جھڑپ کے بعد جھگڑا  شروع ہوگیا۔

گذشتہ دو برسوں سے تجارتی بندرگاہ کی تعمیر کو لےکر مقامی ماہی گیروں ، ٹھیکیدار کمپنی اور حکومت کے درمیان رسہ کشی جاری ہے۔ ہردن پولس تھانے میں شکایتیں درج کرنے کا سلسلہ بھی جاری ہے۔ جمعہ کی صبح تجارتی بندرگاہ تعمیر کے مخالف جہد کاروں اور شری چکر ایکسم کمپنی کے رمیش نائک کے درمیان  زبانی جھڑپ شروع ہوگئی، جس  کے بعد جھگڑا شروع ہوگیا۔ اس تعلق سے سوشیل میڈیا پر ایک وڈیو وائرل ہوئی، جس میں  بعض لوگ اپنے  ہاتھوں میں لوہے کی سلاخیں پکڑ کر بھاگ دوڑ کرتے نظر آئے ۔

وڈیو کلپ میں  ٹھیکیدار کمپنی والے کئی ساری ٹرکوں کے ساتھ تجارتی بندرگاہ کا کام کرتے نظر آئے، جس کے دوران  ماہی گیروں نے سوال کیا کہ یہاں کیوں کام کیا جا رہا ہے۔ تب جواب میں ٹھیکیدار رمیش نائک کو  اونچی آواز میں بات کرتا ہوا دیکھا گیا۔ خیال رہے کہ 6ماہ پہلے پولس سکیورٹی کے ساتھ تجارتی بندرگاہ کی تعمیر شروع کی گئی تھی۔ 6ماہ گزر گئے ابھی تک سڑک کا کام نہیں ہونے کی بات کہی جارہی ہے۔