بھٹکل 19؍ستمبر (ایس او نیوز) میسورو میں مندر کو مہندم کرنے پر پوری ریاست میں ہندوتوا وادیوں نے  خاص طور پر ایک ہنگامہ کھڑا کررکھا ہے اور بی جے پی حکومت پر تنقید، دھمکی اور احتجاجات کا سلسلہ چل پڑا ہے ۔ اسی پس منظر میں بھٹکل کے سابق ایم ایل اے منکال وئیدیا نے بھی تبصرہ کرتے ہوئے کہا ہے کہ بی جے پی حکومت نے ہندووں کے جذبات کو ٹھیس پہنچائی ہے ۔
    
منکال وئیدیا نے حکومت کو تنبیہ کرتے ہوئے کہا کہ صرف بھٹکل حلقہ میں ہی نہیں ریاست کے کسی بھی حصہ میں ہندو مندروں کو منہدم کرنے کی کوشش ہوگی تو اس کے خلاف احتجاج کا سامنا کرنا پڑے گا ۔ انہوں نے کہا کہ میسورو میں 700سالہ تاریخی مندر کو بھکتوں کے علم میں لائے بغیر انتظامیہ کمیٹی کو اعتماد میں لے بغیر راتوں رات جے سی بی کا استعمال کرتے ہوئے اچانک زمیں بوس کردیا گیا ہے۔

ہندوتوا کے ایجنڈے پر اقتدار پانے والوں کے ہاتھوں سے ہی ہندو مندر منہدم کیا گیا ہے ۔ ہندو مندروں کے انہدام کا فیصلہ درست نہیں ہے ۔ اگر یہ سلسلہ جاری رہا تو پارٹی کی طرف سے اس کے خلاف احتجاج کا راستہ اپنانا پڑے گا ۔ منکال نے کہا کہ اپنے آپ کو ہندو اور خود کو ہندووں کا محافظ بتا کر اقتدار پر آنے والے عوامی نمائندوں کی طرف سے ابھی تک کوئی بیان یا پریس ریلیز جاری نہ کیے جانے سے وہ لوگ عوام کے سامنے ننگے ہونے جیسی پوزیشن میں آ گئے ہیں ۔