یلاپور ضمنی الیکشن میں بی جے پی امیدوار شیورام ہیبار کے خلاف استعمال ہورہا ہے ’ہنی ٹریپ‘ کا ہتھیار
یلاپور 4/دسمبر (ایس او نیوز) گزشتہ دنوں ریاست کے بہت سارے سیاسی لیڈروں کے تعلق سے یہ انکشاف ہواتھا وہ لوگ ’ہنی ٹریپ‘ کے ذریعے بلیک میل کیے جانے کا شکار ہوگئے ہیں۔ ریاستی پولیس کا ایک خصوصی دستہ ’ہنی ٹریپ‘ اسکینڈل کی جانچ کررہا ہے، جس کے بعد معلوم ہوا ہے اس’ہنی ٹریپنگ‘ ریکیٹ نے ریاست کے کئی نامورسیاست دانوں کو اپنا شکار بنایاہے، اور اس میں موجودہ اراکین اسمبلی، وزراء کے علاوہ سابقہ اسمبلی میں نااہل قرار دئے گئے اراکین بھی شامل ہیں۔مگر پولیس نے ان کی تفصیلات عام نہیں کی ہے۔
اس کے باوجود مبینہ طور پر موقع کا فائدہ اٹھاتے ہوئے یلاپور ضمنی انتخاب میں بی جے پی امیدوار شیورام ہیبار کے خلاف بنگلورو کے ایک بدنام زمانہ سنسنی پھیلانے والے کنڑا اخبار میں ہتک آمیز مضمون شائع ہوا ہے اور ہنی ٹریپ کا شکار ہونے والوں میں شیورام ہیبار بھی شامل ہونے کی بات کہی گئی ہے۔ اس طرح کسی قسم کا ٹھوس ثبوت سامنے لائے بغیر اخبار میں ہیبار کے اس سیکس اسکینڈل میں ملوث ہونے کی خبر جو شائع کی گئی ہے اس کے بارے میں خود ہیبار کا کہنا ہے کہ کانگریس پارٹی کی طرف سے محض سیاسی مفاد پرستی کے تحت ایسی ذلیل حرکت کی گئی ہے۔ اس معاملے میں ذرابرابر بھی سچائی نہیں ہے۔
شیورام ہیبار کی طر سے الزام لگایاگیا ہے کہ مذکورہ مضمون والے اخبار کی ایک لاکھ سے زیادہ کاپیاں شائع کرکے پورے انتخابی حلقے میں کانگریسیوں کی طرف سے پھیلا دی گئی ہیں۔ لیکن انہیں اس قسم کے ہتھکنڈوں سے کوئی خطرہ نہیں ہے۔ اور وہ اس اخبار کے خلاف ہتک عزت کا دعویٰ کرنے والے ہیں۔