بھٹکل سمیت اُترکنڑا میں موسلادھار بارش کا سلسلہ جاری؛ کل بدھ کو بھی اسکولوں اور کالجوں میں چھٹی کا اعلان
بھٹکل،5؍جولائی (ایس او نیوز) بھٹکل سمیت ضلع اُترکنڑا میں موسلادھار بارش کا سلسلہ جاری ہے جسے دیکھتے ہوئے اُترکنڑا ڈپٹی کمشنر ملئے مہیلن نے کل بدھ کو بھی پیشگی حفاظتی انتظامات کے تحت اسکول اور کالجس سمیت تمام تعلیمی اداروں میں چھٹی کا اعلان کیا ہے۔ بھٹکل کی طرح ہوناور، کمٹہ ، انکولہ اور کاروار میں بھی بھاری بارش ہونے کی اطلاع ملی ہے اور کئی علاقوں میں ندیوں کا پانی راستوں پر بہنے کی اطلاعات ہیں۔ پڑوسی ضلع اُڈپی اور دکشن کنڑا میں بھی موسلادھار بارش کا سلسلہ جاری ہے۔
محکمہ موسمیات نے ساحلی کرناٹکا میں 5 جولائی سے 7 جولائی تک بھاری بارش ہونے کے امکانات ظاہر کئے تھے، جس کو دیکھتے ہوئے آج 5 جولائی کی طرح کل 6 جولائی کو بھی ضلع اُترکنڑا کے تمام اسکولوں اور کالجوں میں چھٹی کا اعلان کیا گیا ہے۔ اُدھر مینگلور میں دکشن کنڑا کے ڈپٹی کمشنر ڈاکٹر کے وی راجیندرا اور اُڈپی کے ڈپٹی کمشنر کورما راو نے بھی اپنے اپنے اضلاع میں اسکولوں اور کالجوں سمیت تمام تعلیمی اداروں میں چھٹی کا اعلان کیا ہے۔
بھٹکل میں پانچ گھروں کو نقصان: اتوار او رپیر کی طرح آج منگل کو بھی بھٹکل میں زوردار بارش کا سلسلہ جاری رہا، جس کے نتیجے میں بعض نشیبی علاقوں میں پانی جمع ہوجانے سے ٹریفک نظام متاثر رہا، البتہ راحت کی بات یہ رہی کہ بارش رُکتے ہی پانی بھی خالی ہورہا تھا۔
موسلادھار بارش کے نتیجے میں کل پیر کو مرڈیشور میں دو مکانوں کو نقصان پہنچا تھا، آج منگل کو بینگرے ، شرالی کے چتراپور اور ماولی ٹو میں ایک ایک مکان کو نقصان پہنچا ہے۔
کل پیر صبح آٹھ بجے سے آج منگل صبح آٹھ بجے تک بھٹکل میں 115 ملی میٹر بارش ریکارڈ کی گئی ہے۔ تحصیلدار دفتر سے ملی اطلاع کے مطابق اس سال اب تک بھٹکل میں 1548.2 ملی میٹر بارش ہوئی ہے۔
