ہلیال : فیس بک پیج پر سابق وزیر اعظم اندراگاندھی کے خلاف توہین آمیز پوسٹ کرنے پر ایک گرفتار
ہلیال:30؍مارچ (ایس او نیوز) لوک سبھاانتخابات کے پیش نظر سوشیل میڈیا پر کافی گہما گہمی دیکھی جاسکتی ہے اور متنازعہ پوسٹ کو لےکر ایک دوسرے کے خلاف کارروائی کا مطالبہ بھی زور پکڑتا جارہاہے۔ ایسے ہی ایک معاملے میں اپنے فیس بک پیج پر سابق وزیر اعظم اندراگاندھی کی شخصیت کو لے کر توہین آمیز پوسٹ کرنے پر پولس نے ایک نوجوان کو گرفتار کرلیا ہے اور اُس سے پوچھ تاچھ جاری ہے۔
ذرائع سے ملی اطلاع کے مطابق ہلیال شہر کے مکین سنتوش رگٹے نے مبینہ طور پر اپنے فیس بک پیج پربہت توہین آمیز ریمارکس ظاہر کئے جانے پر کانگریس پارٹی والوں نے فوری نوٹس لیتے ہوئے پولس تھانہ پہنچ کراُس کے خلاف قانونی کارروائی کی مانگ کی۔ جس پر پولس نے معاملہ درج کرتے ہوئے ملزم کو اپنی تحویل میں لے لیا۔ اب اُس سے پوچھ تاچھ جاری ہے۔
ودھان پریشد کے رکن ایس ایل گھوٹنیکر کی قیادت میں بلاک کانگریس جنرل سکریٹری ستیہ جیت نے فیس بک پیج پر متنازعہ پوسٹ کرنے والے سنتوش رگٹے کے خلاف شکایت سونپی ہے۔ ایس ایل گھوٹنیکر نے بتایا کہ سابق وزیر اعظم اندراگاندھی کو پوری دنیا آئرن لیڈی کے طورپر عزت و احترام کی نگاہ سے دیکھتی ہے۔ پہلی خاتون وزیر اعظم اندراگاندھی ایک سیاسی مدبر کے طورپر اپنی شہرت رکھتی ہیں، ایسی فخریہ شخصیت کے خلاف توہین آمیز ریمارکس کرنا بہت گھناونی حرکت ہے۔ جس کی کانگریس پارٹی سخت مذمت کرتی ہے۔
وفد میں اے پی ایم سی صدر شری نواس گھوٹنیکر ، بلدیہ ممبران نوین کاٹکر ، فیاض شیخ، شمیم بانو، جنبووالے ، لیڈران مالا ، عبدالرحیم دلال، روی ، روہن ، انیل فرنانڈیز وغیرہ شریک تھے۔ ڈی وائی ایس پی ڈاکٹر موہن پرساد نے جائے وقوع پر پہنچ کر حالات کا جائزہ لیا ہے ۔ سی پی آئی بی ایس لوکاپور کی رہنمائی میں پی ایس آئی آنند مورتی نے ملزم سنتوش رگٹے کے خلاف کیس درج کرنے کے بعد چھان بین کررہے ہیں۔