منگلورو: وزیر اعلیٰ بومئی کو دھمکی دینے کا شاخسانہ - ہندو مہا سبھا لیڈر دھرمیندرا گرفتار
منگلورو 19 / ستمبر (ایس او نیوز) آل انڈیا ہندو مہا سبھا کے لیڈر دھرمیندرا کی جانب سے کل منگلورو کے ایک ہوٹل میں منعقدہ پریس کانفرنس کے دوران گاندھی جی کی طرح وزیر اعلیٰ بسوا راج بومئی کو بھی قتل کرنے کی دھمکی دینے کے بعد آج پولیس نے دھرمیندرا کو گرفتار کر لیا ہے۔
خیال رہے کہ غیر قانونی مذہبی مقامات کو ڈھانے کا جو حکم سپریم کورٹ نے دیا تھا اس پس منظر میں کارروائی کرتے ہوئے میسورو میں قدیم مندر ڈھائے حانے کی مذمت کرتے ہوئے آل انڈیا ہندو مہا سبھا کے چیف سیکریٹری دھرمیندرا نے وزیر اعلیٰ بومئی ، سابق وزیر اعلیٰ ایڈی یورپا اور مزراعی وزیر ششی کلا جولّے کو مخاطب کرکے کہا تھا :" ہم نے گاندھی جی کو نہیں بخشا، تو تم ہمارے لئے کیا چیز ہو ۔ کیا تم سمجھتے ہو کہ ہم جنہوں نے گاندھی جی کو قتل کیا ہے ، کیا تمہارے ساتھ بھی ایسا ہی نہیں کر سکتے ؟ "
اس پریس کانفرنس کے بعد ہندو مہا سبھا کے ریاستی صدر لوہیت کمار نے ہندو مہا سبھا کے نام کا غلط استعمال کرنے اور وزیر اعلیٰ کو جان سے مارنے کی دھمکی دینے کے الزام میں آل انڈیا ہندو مہا سبھا کے چیف سیکریٹری دھرمیندرا اور اس کے دیگر ساتھیوں راجیش پوترن، سندیپ شیٹی، پریم پولالی،پروین شیٹی، سدھاکر شیٹی اور الہاس کے خلاف برکے پولیس اسٹیشن میں ایف آئی آر درج کروائی تھی ۔ اس پر کارروائی کرتے ہوئے پولیس نے دھرمیندرا کو گرفتار کرلیا ، بتایا گیا ہے کہ پریس کانفرنس میں موجود دیگر ملزمین کو بھی گرفتار کرنے کی کوشش جاری ہے ۔