سپریم کورٹ میں حجاب کیس پر سماعت آج سے شروع، عدالت نے کرناٹک حکومت سے مانگا جواب؛ 5 ستمبر کو ہوگی اگلی سماعت
نئی دہلی،29؍اگست (ایس او نیوز؍ایجنسی) کرناٹک میں حجاب پہننے پر پابندی کو لے کر سپریم کورٹ میں آج سے سماعت شروع ہوگئی ہے۔ آج پیر کو جسٹس ہیمنت گپتا اور سدھانشو دھولیا کی بنچ نے تعلیمی اداروں میں حجاب پر پابندی کے تعلق سے دائر کی گئ عرضی کا جواب دینے کرناٹک کی بی جے پی حکومت کو نوٹس جاری کی ہے۔
یاد رہے کہ کرناٹک ہائی کورٹ نے اپنے فیصلہ میں کہا تھا کہ اسلام میں حجاب پہننا لازمی عمل نہیں ہے اس فیصلے پر سپریم کورٹ میں چیلنج کیا گیا ہے۔ اب اس معاملے کی آئندہ سماعت 5 ستمبر کو ہوگی۔
کرناٹک ہائی کورٹ نے تعلیم گاہوں کے کلاس روم میں حجاب پہننے کی اجازت دینے کی گزارش کرنے والی اُڈپی کے ’گورنمنٹ پری-یونیورسٹی گرلس کالج‘ کی مسلم طالبات کے ایک گروپ کی عرضی کو خارج کردیا تھا اورکہا تھا کہ اسکول یونیفارم کا اصول اور ایک معقول پابندی ہے اور اسے آئینی طور پر قبول کیا جاتا ہے، جس پر طالبات کوئی اعتراض نہیں کر سکتیں۔ عدالت نے یہ بھی کہا تھا کہ حکومت کے پاس 5 فروری 2022 کا سرکاری حکم جاری کرنے کا حق ہے اور اسے کالعدم قرار دینے کا کوئی معاملہ نہیں ہے۔ اس حکم میں، ریاستی حکومت نے ان کپڑوں کے پہننے پر پابندی لگا دی ہے، جس سے اسکولوں اور کالجوں میں مساوات، سالمیت اور امن عامہ میں خلل پڑتا ہے۔